Hoc est translatum bene et fideliter factum, XIº kalendas marcii anno Domini millesimo CCCº XXXº octavo, cum auctoritate venerabilis Dominici de Falchs, justicie ville Sancti Mathei, sumptum a quodam publico instrumento in pergameno scripto et per alphabetum diviso, non cancellato, non abolito seu viciato, nec in aliqua sui parte suspecto, cuiusquidem instrumenti tenor de verbo ad verbum sequitur in hunc modum:

Anno Domini millesimo ducentesimo septuagesimo quarto, octavo kalendas octobris.

Cum reverendus dominus frater Berengarius de Almenara castellanus Emposte, esset apud Sanctum Matheum presencialiter constitutus, comparuerunt coram ipso Dominicus Narbonés, P. Galia, A. Mercer, Bn. Tallaferre, Bn. de Angularia, G. de Fornellis, A. Forner, P. Columbi, F. Segarra, A. Balaguer, Bn. Roy, Roger Foc Encés, Vaquerius, Bn. Guitart, et alii probi homines dicti loci, requirentes cum instantia et humiliter suplicantes, ut cum ipsi essent populati in quibusdam casibus ad consuetudinem Ilerde, et in quibusdam servarent foros Valencie, ac in pluribus casibus diverssos usus tenerent, quod ipse deberet eis dare certas consuetudines, et assignare usus et mores secundum quos de cetero ipsi necnon et alii populatores, presentes et futuri, termini Cervarie regerentur, unde dictus dominus castellanus eorum precibus inclinatus, de consensu fratrum inferius scriptorum duxit taliter providendum:

In primis nos, predictus frater Berengarius de Almenara humilis castellanus Emposte, de assensu et voluntate fratris P. de Pulcrovicino comendatoris Cervarie de fronteria, et fratris P. de Fonoleto, et fratris Guillermi de Sarriano, et fratris Jacobi de Galter capellani nostri, confirmamus vobis universsis habitatoribus ville et termini supradicti et successoribus vestris instrumenta priora acquisicionis, cum locus Sancti Mathei fuit datus ad populandum.

Volumus etiam quod tam in causis quod in justiciis et caloniis, ponderibus et mensuris, panis et vini, pannorum lini et lane, et omnium aliorum, sitis judicati et ducti ad consuetudinem ilerdensem, et usos scriptos et non scriptos, sicut cives et alii habitatores civitatis et termini Ilerde utuntur et reguntur ab bonum intellectum vestrum et successorum vestrorum.

Retinemus preterea in hac concessione et confirmacione, nobis et fratribus Hospitalis presentibus et futuris, omnia que retenta fuerunt in alia donacione facta vobis tempore populacionis per H. de Fullalquer, quondam castellanum Emposte, et in alia carta facta vobis per fratrem Bn. de Salanova vicecastellanum Emposte.

Salvamus etiam vobis instrumentum factum per Gui de la Guespa super mensuratico, leuda et penso, laudimio a quibus vos estis liberi. In dicta autem concessione non intelligimus mensuraticum, quantum ad homines termini Cervarie, immo volumus quod dent mensuraticum ut consueverunt et laudimium ut tenentur.

Retinemus et[iam] dominicaturas nostras, quas habemus in Sancto Matheo et in toto termino Cervarie, cum firma, faticca, laudimio et alia iura dominacionis, sicut modo habemus et habere debemus.

Item, retinemus quod jurati semper ponantur et mittantur, de voluntate nostra vel comendatoris Cervarie qui pro tempore fuerit, et proborum hominum cuiuslibet ville termini Cervarie.

Et confitemur pro hac concessione recepisse a vobis et habuisse mille solidos regalium Valencie, et eos in utilitatem Hospitalis posuisse.

Et ideo renunciamus omni excepcioni non numerate pecunie et doli.

Et nos predicti omnes et singuli qui hanc concessionem liberaliter recipimus, promitimus omnia predicta attendere et complere.

Actum est hoc die et anno in prima linea contentis.

Sig+num fratris Berengarii de Almenara castellani. Sig+num fratris P. de Pulcrovicino comendatoris. Sig+num fratris P. de Fonoleto. Sig+num fratris Guillermi de Sarriano. Sig+num fratris Jacobus de Galter, predictorum, qui supradicta omnia concedimus et firmamus.

Testes huius rei sunt: Dominicus de Belltayll rector ecclesie de Borriana, Guillermus de Montealbano, Bernardus Renart rector ecclesie Sancti Mathei, Salvator Rubei, Arnaldus Ermengou, P. Cortit.

Sig+num Guillermi Taraschoni, notarii publici auctoritate domini regis Aragonum per totam jurediccionem suam, qui mandato dictorum domini castellani et aliorum fratrum predictorum, hec scripsit et clausit die et anno in prima linea contentis.