Noverint universi, quod nos Iacobus Dei gratia rex Aragonum, Maioricarum et Valentie, comes Barchinone et Urgelli et dominus Montispesulani; volumus et concedimus vobis iuratis Iacce presentibus et futuris, et toti concilio eiusdem ville, quod pignoretis et distringatis et possitis distringere et pignorare omnes et singulos vicinos et habitatores Iacce, ad dandum et serviendum vobiscum insimul nobis et nostris, in exercitibus et cavalcatis et eorum redemptionibus, et in omnibus aliis serviciis regalibus et vicinalibus pro hereditatibus et rebus quas tenent vel tenebunt de reyalenco, et specialiter omnes clericos eiusdem ville presentes et futuros, ad serviendum nobis in omnibus hereditatibus et aliis rebus quas tenent vel tenebunt de reyalenco, ratione emptionis vel donationis vel alio quoque modo, nisi tantum pro illis quas habent vel habebunt ratione sui patrimonii.

Et volumus similiter et mandamus, quod compellatis et pignoretis et possitis compellere et pignorare, ad dandum et serviendum in predictis omnes et singulos monetarios et operarios monete, nisi tantum illos qui in servitio monete personaliter extiterint, non obstantibus aliquibus privilegiis, franchitatis a nobis vel a nostris antecessoribus eisdem concessis.

Data Valentie IIIº kalendas aprilis anno Domini Mº CCº XLº nono.