Noverint universi quod nos, Jacobus, Dei gratia rex Aragonum, Maioricarum et Valentie, comes Barchinone et Urgelli et dominus Montispesulani; per nos et nostros concedimus vobis fratri Bernardo de Altariba, tenenti locum magistri Templi in Aragonia et Cathalonia, et fratribus eiusdem ordinis presentibus et futuris, quod habeatis et teneatis villam de Burriana et castrum et villam de Onda, cum exitibus, redditibus, questiis et parte decima et quibuslibet aliis proventibus nobis et nostris quoquomodo pertinentibus et debentibus pertinere, tanto tempore et tamdiu quousque sitis soluti de debito mille marcharum argenti quas vobis debebamus.

Volumus etiam et concedimus, quod de redditibus ipsorum locorum levetis annuatim sex milia solidos realium, pro expensis triginta hominum custodiendum castrum de Onda. Residuum vero ipsorum reddituum, redat vobis in solutionem predictarum marcharum.

Verum, si redditus dictorum locorum non suficerent ad predictam custodiam de Onda, illud quod defuerit habeatis super eisdem castro et villa de Onda et de Burriana et locis aliis, que ratione predictarum marcharum tenetis obligata, que tanto tempore teneatis quousque sitis inde soluti.

Promittentes quod predictum castrum et villam de Onda et de Burriana, cum omnibus et singulis redditibus et aliis supradictis, faciemus vos et domum et fratres Templi habere et tenere, et pacifice possidere, quousque sitis soluti de eo quod remaneat ad solvendum vobis de quantitate mille marcharum, quas fratris Guillermo de Cardona, magistro Templi, debebamus.

Datum Valencie idus augusti anno Domini millesimo ducentesimo quadragesimo nono.

Sig+num Jacobi Dei gratia regis Aragonum, Maioricarum et Valentie, comitis Barchinone et Urgelli et dominus Montispesulani.

Testes sunt Guillermus de Aguilone, Guillermus de Crexello, Petrus de Ciliis, Bertrandus de Castelloto, Berengarius de Tornamira.

Sig+num Petri Andree, qui mandato domini Regis hec scribi fecit loco die et anno prefixis.