Noverint universi quod nos, Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; per nos et nostros concedimus vobis universis hominibus et singulis omnium aldeyarum Turolii, presentibus et futuris, et statuimus imperpetuum quod quilibet vestrum qui habet vel habebit de cetero bona mobilia et immobilia ac semovencia, valencia octingentos solidos jacchensis et ultra, sit semper dum ipsa bona habuerit valencia octingentos solidos jacchensis et ultra postarius, et pro ipsa posta octingentorum solidos jacchensis teneatur peytare et ponere partem suam in omnibus peytis, serviciis et quibuslibet aliis regalibus et vicinalibus exaccionibus tamen modo et non pro aliis bonis suis.

Et quod ille qui habet vel habebit bona valencia quadringentos solidos jacchensis et ultra, dum tamen non habeat bona valencia octingentos solidos jacchensis, teneatur peytare et ponere ac dare similiter partem suam pro ipsis quadringentis solidos jacchensem, tamen modo et sit melius postarius.

Et quod ille qui habet vel habebit bona valencia ducentos solidos jacchensis et ultra, dum tamen non habeat bona valencia quadringentos solidos jacchenses, teneatur peytare et ponere ac dare partem suam similiter pro ipsis ducentis solidos jacchensis, tamen modo et sit quatur postarius.

Et quod ille qui habet vel habebit bona valencia centum solidos jacchensis et ultra, dum tamen non habeat bona valencia ducentos solidos jacchenses, teneatur peytare similiter pro ipsis centum solidos, tamen modo et sit octavus postarius.

Et omnes illi qui non habent vel non habebunt bona valencia centum solidos jacchensem, teneatur peytare pro bonis eorum ad cognicionem et tatxationem illorum que computabunt et talliabunt peytas et alias regales et vicinales exacciones, secundum quod ipsis computatoribus et talliatoribus melius videbitur expedire.

Mandantes senioribus, majoribusdomus, judicibus, justiciis, juratis et universis aliis officialibus et subditis nostris, presentibus et futuris, quod contra hoc statutum nostrum non veniant nec aliquem venire permitant, unquam aliquo tempore, aliquo modo vel aliqua racione.

Datum apud Montempesulano, septimo kalendas januarii anno Domini Mº CCº Lº octavo.

Signum + Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: [1ª col.] Jauzbertus de Castro Novo. [2ª col.] G. de Angularia, Berengarius de Cardona. [3ª col.] Eximinus Petri de Arenoso. G. de Pinos.

Sig+num Petri de Capellades, qui mandato domini Regis hec scribi fecit, loco die et anno prefixis.