Noverint universi quod nos, Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; per nos et nostros promittimus vobis judici, justicie, juratis, alcaldis et toti concilio ville et aldearum Turolii, presentibus et futuris, imperpetuum, quod nunquam aliquo tempore recipiemus vel aufferemus vobis nec a posse vestro extrahemus, aliqua racione vel causa, loricas vel guarnimenta ferrea que emetis et emere debetis de mandato nostro, de primicias quas hoc anno dare debetis, nec de illis etiam quas de cetero emetis, nec volumus quod vos ipsa similiter possitis vendere vel alienare aliqua racione vel causa.

Set volumus et concedimus vobis quod ipsas loricas et guarnimenta ferrea habeatis, custodiatis et retineatis semper ad utilitatem vestram, et deffensionem vestram et vestrorum.

Datum in Montispesulano XIIº kalendas augusti anno Domini Mº CCº LXº secundo.

Signum + Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: [1ª col.] Gaucerandus de Pinos. [2ª col.] R. de Guardia. Ato de Focibus. [3ª col.] Garcia Ortiz de Açagra. Gomicius de Podio.

Sig+num Petri de Capellades, qui mandato domini Regis hec scribi fecit et clausit, loco die et anno prefixis.