Noverint universi quod nos Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; damus et concedimus vobis toti concilio Turolii presentibus et futuris imperpetuum, ad opus expensarum vestrarum, quod de cetero teneatis et tenere possitis in villa Turolii fanecam et fanechas ad conducendum sive locandum, prout dictas fanecas tenebant et tenere consueverant recardarii et recardarie eiusdem ville, et habeatis ac percipiatis de qualibet fanecha bladi unam palatam, prout dictam palatam dicti recardarii et recardarie hucusque habere et recipere consueverunt, et de cetero aliquis recardarius vel recardaria non sit ausus tenere fanecham vel fanechas aliis ad conducendum nec aliis aliud in villa Turolii nisi illud tantum qui fuerint ad tenendum dictas fanecas constituti per maiordomos vestri concilii antedicti.

Mandantes baiulis, justiciis, juratis, alcaldis et aliis officialibus Turoli, presentibus et futuris, quod hanc donacionem nostram firmam habeant et observent et faciant ab omnibus inviolabiliter observari, et non contraveniant nec aliquem contravenire permittant aliquo modo seu etiam aliqua ratione, si de nostro confidunt gratia vel amore.

Datum Murcie VIIº kalendas marcii anno Domini Mº CCº LXº quinto.