Jacobus, Dei gratia rex Aragonum, comes Barchinone et dominus Montispesulani; fidelibus suis vicario et probis hominibus et toti populo Barchinone. Salutem et gratiam.

Fidelitatis vestre nuper receptis litteris cognovimus evidenter, quod super facto monete ad comodum terre nostre, fecistis salubriter constitutum ut in cartis contractuum poneretur "valente marcha argenti octuaginta et octo solidos de duplenco", ubi antiquitus ponebatur "valente marcha argenti quadraginta et quatuor solidos barchinonenses de quaterno".

Et ne contractus fierent ad aurum vel argentum vel malguirensis, sed ad istam monetam solummodo de duplenco.

Et quodcumque debitam de priori moneta vel malguirense debebatur priusquam hec videlicet cuderetur, solvantur XVIII denariis de duplenco pro XII de quaterno.

Et quodcumque deberi incepit ex eo tempore et citra, solvantur XVI de istis pro XII de antiquis.

Et campsores cambiant prout potuerint.

Et qui debet aurum vel argentum, solvat secundum quod continetur in instrumentis publicis creditorum.

Nos igitur, prudenciam et legalitatem vestram plurimum comendantes, licet quibusdam videatur quod in quibusdam de premissis capitulis aliqui contra justiciam aggravantur, constitucionem predictam sicut bona fide et ad utilitatem terre noscimus esse factam auctoritate regia confirmamus, et presenti privilegio communimus.

Statuentes sub pena corporum et universe substancie subditorum, quod hoc statutum observent fideliter si penam premissam voluerint evitare.

Mandantes firmiter baiulis, vicariis et universis judicibus terre nostre, ut eandem constitucionem faciant observari, et secundum eam determinent questiones.

Datum apud Calataiub Vº kalendas januarii anno Domini Mº CCmo. XXIIº.

Sig+num Jacobi Dei gratia regis Aragonum, comitis Barchinone et domini Montispesulani.

Ego Dalmacius hoc scribi feci, mandato domini Regis, pro B. barchinonense episcopo, domini Regis cancellario, cum litteris supprapositis in VIIª linea, ubi dicitur "cambiant", et hoc + feci.