Noverint universi quod nos Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; damus et concedimus de gracia speciali omnibus et singulis macellariis sive carnificibus Barchinone, tam presentibus quam futuris, quod habeatis pascua vestri bestiarii in pratis et montaneis, silvis, garricis, nemoribus, locis heremis et erbosis, in montibus et planis, et in cunctis aliis locis vacuis et heremis tocius terre nostre et dominacionis, exceptis vineis et ortis civitatis Barchinone.

Et si ultra predicta loca in quibus dicta pascua vobis damus et concedimus vestrum bestiare, aliquod damnum sive malum alcui vel aliquibus fecerit vel intulerit, tam in blaso quam in aliis restituatur a vobis et emendetur illis illud malum sive damnum, ad cognicionem hominum laboratorum illius comitatis, in quo dictum malum et damnum factum fuerit et illatum.

Mandantes baiulis, vicariis et universis aliis officialibus et subditis nostris, tam presentibus quam futuris, quod hanc graciam a nobis vobis concessam firmam habeant et observent et faciant ab omnibus inviolabiliter observari, et nunquam contraveniant nec aliquem contravenire permittant aliqua racione.

Datum Barchinone XVIº kalendas aprilis anno Domini millesimo CCmo. sexagesimo sexto.