Noverint universi quod nos, Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; cum propter prolixitates et elongamenta que pervenuntur in causis que agitantur per legistas et advocatos, que ad utilitatem gentium possent facilius terminari; ideo, per nos et nostros statuimus et volumus imperpetuum, quod nullus legista sive advocatus posset uti officium advocacionis in civitate Valencie et toto regno eiusdem, ne dare libellum nec procedere secundum formam legum, in causis que in dicta civitate vel regno predicto agitabuntur; immo volumus et statuimus in perpetuum quod iusticie Valencie, que in dicta civitate fuerit constitutus, cum consilio iusto iustorum juratorum civitatis eiusdem, secundum discretionem eorum et secundum foros dicte civitatis, iudicet et determinet omnes causas criminales et civiles, que ad eum pervenerint, omni forma legum et advocatorum penitus exclusa.

Et sic volumus quod dicta constitutio habeat semper inviolabiliter perpetuam roboris firmitatem.

Datum apud Alcanicium VIIIº kalendas marcii anno Domini Mº CCº quinquagesimo.

Sig+num Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: Bernardus de Sancta Eugenia, Eximinus Petri, Petrus Cornelli, majordomus Aragonum, Eximinus de Focibus, Ferrarius Garces de Roda.

Sig+num Arnaudi de Hulmo, qui mandato domini Regis, pro Gonzalvo Petri, eius notarii, hec scripsit loco die et anno prefixis.