Noverint universi quod nos, Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; per nos et nostros concedimus et indulgemus vobis Eximino de Albero, quod quandocumque volueritis possitis vos et vestri vendere et quocumque modo volueritis alienare cui et quibus volueritis, exceptis clericis et sanctis et personis religiosis, alcheriam que vocatur Bartx Algeval, que est inter terminum de Alfandech de Mariynen et terminum Xative et de Penit, et de Bayren, totam integre, cum omnibus terminentiis et pertinentiis suis, prout continetur in instrumento donationis quam vobis fecimus de ipsa alcheria, non obstante illa conditione que continetur in instrumento donationis quam vobis fecimus de ipsa alcheria, videlicet quod eam non possetis vendere in vita vestra vel modo aliquo alienare, et non obstante aliqua alia condicione in dicto instrumento donationis predicte apposita vel contenta.

Ita tamen quod quandocumque dictam alcheriam vendere volueritis, nobis significetis antequam eam vendatis, et si eam retinere voluerimus possimus hoc facere pro tanto quantum alius dare voluerit in eadem, sin autem venderetis eam et alienetis cui et quibus volueritis, ut dictum est superius.

Et venditionem et alienationem quam inde feceretis, laudamus et ex certa sciencia confirmamus.

Recognoscimus insuper et confitemur quod per hac concessione et indulgencia quam vobis facimus de predicta alcheria vendenda et alienanda, recepimus a vobis mille quingentos solidos realium Valencie, de quibus concedimus nos esse bene paccatos.

Datum Burriane XVIIº kalendas madii anno Domini Mº CCº Lº secundo.

Signum + Jacobi Dei gratia regis Aragonum, Maioricarum et Valencie, comiti Barchinone et Urgelli et domini Montispesulani.

Testes sunt: [1ª col.] G. de Angularia. [2ª col.] G. de Aquilone. Eximinus de Focibus. [3ª col.] F. Garcez de Roda. F. de Turrilliis.

Sig+num Petri Andree qui mandato domini Regis hec scribi fecit, loco die et anno prefixis.