Noverint universi quod nos, Jacobus Dei gratia rex Aragonum, Maioricarum et Valentie, comes Barchinone et Urgelli et dominus Montispesulani; per nos et nostros damus et concedimus per hereditatem propriam, francam et liberam vobis, dilecto nostro Eximinio Petri de Arenoso et vestris, in perpetuum, castrum et villam de Borriol, cum omni fortitudine ipsius castri et omnibus alchareis suis, et cum casis et casalibus, vineis, hortis, campis ac terris cultis et incultis, heremis et populatis, furnis, molendinis et columbariis, areis et palludibus, aquis, herbis, pratis et pascuis, piscationibus et venationibus, montibus, lignis et silvis, et arboribus fructiferis et infructiferis, introitibus et exitibus, terminis et suis pertinentiis universis a celo in abissum, cum omnibus etiam hominibus et feminis in predicto castro et villa et alchareis et terminis eorundem, habitantibus et habitaturis cuiuscumque legis vel conditionis sunt vel erunt, et cum peytis, questis et demandis, donis, servitiis, caloniis et iustitiis civilibus et criminalibus, exercitibus et cavalcatis, et eorum redempcionibus, quintis, quartis, invenis, tributis et omnibus aliis et singulis ius nos vel nostris in predicto castro et villa et alchareis et terminis eorundem et ab hominibus et feminis ibidem habitantibus et habitaturis debuimus habere et percipere quoquomodo, cum omni etiam dominio et iure, vocibus et actionibus realibus et personalibus que nos in dicto castro villa et alchareis et terminis eorundem habuimus vel habere debuimus, quolibet modo vel qualibet racione, integre ac sine ullo nostro nostrorumque retentu. Et sicut melius, firmius et utilius ad utilitatem et salvamentum vestrum et vestrorum potest dici vel intelligi ullo modo. Et extrahentes predicta omnia et singula a iure, dominio et possessione nostra et nostrorum, eadem in ius, dominium et possessionem vestram et vestrorum mittimus et transferimus.

Inducentes vos in corporalem dominium et possessionem omnium et singulum predictarum irrevocabiliter, cum hoc presenti instrumento perpetuo valituro, ad habendum, tenendum, possidendum, expletandum, dandum, vendendum, impignorandum, alienandum, et ad omnes vestras vestrorumque voluntantes cui et quibus volueritis libere perpetuo faciendas.

Ita tamen quod vos et vestri et quicumque post vos vel vestri, dictum castrum et villam habuerit vel tenuerit quoquomodo, mittatis et mittere teneamini in nostrum servitium et nostrorum unum militem qui serviat nobis et nostris in regno Valencie secundum forum Aragonie quandocumque inde fueritis requisiti.

Datum Xative duodecimo kalendas martii anno Domini millesino ducentesimo quinquagesimo quarto.

Sig+num Jacobi Dei gratia regis Aragonum, Maioricarum et Valencie, comitis Barchinone et Urgelli et domini Montispesullani.

Testes sunt: Guillermus de Angularia, Ato de Focibus, Bernardus Guillermus de Entenza, Petrus de Queralt, Corberan de Vidaure.

Sig+num Petri Andree, qui mandato domini Regis pro domino fratre Andrea, episcopo Valentino cancellario suo, hec scripsit loco die et anno prefixis.