Noverint universi quod nos, Jacobus, Dei gratia rex Aragonum, Maioricarum et Valencie, comesque Barchinone et Urgelli et dominus Montispesulani; per nos et nostros damus et concedimus vobis, probis hominibus et universitati ville Algezire, presentibus et futuris, quod in unoquoque illorum açutorum que sunt in rivo seu flumine Xuquari, ab açuto çequie nove Algezire quam nos fieri fecimus usque in mare, dimittatur et sit semper de çetero unus portellus in medio uniuscuiusque açuti, qui habeat viginti quinque palmos regales in amplium, per quem portellum barche vacue et onerate et alia transire possint libere et sine aliquo obstaculo et impedimento.

Et in ipsis portellis vel aliquo eorum, non sit ausus aliquis canarum facere ad piscandum, nec palos etiam ibi firmare seu ponere ad parandum retes, nec ponere etiam, seu eicere ibipetras vel trabes, aut aliquid aliud, propter quod transitus aquel vel barcharum aut aliorum que per dictum flumen ducentur possunt in ipsis portellis modo aliquo impediri, seu aliquem recipere districtum.

Concedimus etiam vobis quod barquerii seu quibuslibet alii duçentes barquas vacuar vel oneratas, predictum flumen Xucari possint ipsas sirgare per ripam ipsius fluminis, seu per extremum hereditatum ipsi flumini contiguarum, ex utraque parte eiusdem fluminis a suppradicto scilicet açuto usque in mare, franche scilicet et libere, et sine impedimento et contradiccione alicuius persone, sicut illis qui ipsas barquas sirgabunt neccessarium fuerit.

Mandantes firmiter universis tenentibus dictos açutos, ac universis officialibus et aliis subditis nostris presentibus et futuris, quod predictos portellos in dictis açutis, faciant et teneant ac teneri faciant de latitudine viginti et quinque palmorum regalium, sine ullo contrario et impedimento, quod ibi non fiat ab aliquo vel ab aliquibus, ut dictum est.

Et predicta omnia firma habeant et observent ac faciant perpetuo inviolabiliter observari, ut superius continetur, et non contraveniant nec aliquem contravenire permittant aliqua racione.

Quicumque autem contra dictum mandatum nostrum sive concessionem aut statutum in aliquo venire attemptaverint, iram et indignacionem nostram et penam quinquagintarum morabatinorum auri nobis vel baiulo nostro Algezire loco nostri solvendam se noveritis incursurum, dampno illato primitus et plenarie restituto.

Pro qua siquidem penam liceat vobis dicte universitati et vestris semper pignorare auctoritate vestra propria illos qui indideant in eadem et ea pignora reddere baiulo dicti loci.

Datum in Algezira XIº kalendas januarii anno Domini millesimo ducentessimo septuagesimo.