Noverint universi, quod nos Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; per nos et nostros damus et concedimus vobis, nobili et dilecto Guillermo Raymundi de Moncada, domino de Nules, et vestris successoribus imperpetuum, totam illam aquam que de cequia illa quam noviter extraximus de rivo de Millars ad opus populacionis nostre Burriane, que vocatur Villa Regalibus, superabit hominibus eiusdem populationis, et quam ipsi homines dicte populacionis necessaria non habuerint ad rigandum.

Ita, videlicet quod ipsius aquam que eis superabit et ipsi necessariam non habuerint ad rigandum, habeatis vos et vestri homines de Nules ad rigandum terminum castri de Nules, quantumcumque scilicet inde rigare poterunt cum eadem. Ita quod ad unaquaque jovata terre, que de dicta aqua rigabitur in termino de Nules, teneamini dare et detis nobis et nostris duos solidos et medium regalium Valencie, in unoquoque anno, quolibet festo sancti Michaelis septembris, vos seu homines vestri de Nules, qui de dicta cequia sive aqua rigabunt.

Volentes et statuentes ac concedentes vobis, quod homines dicte populacionis Ville Regalis statim cum rigaverint id quod rigare habuerint de dicta aqua, qualibet die seu nocte, tornent aquam ad matrem, scilicet ad cequiam maiorem dicte populacionis, et claudant presam dicte cequie; de qua aquam accipient ad rigandum, quod si non fecerint, donent sexaginta solidos regalium nobis, pro pena, quandocumque scilicet et quocienscumque aquam illam, cum qua rigaverint, non tornabunt ad matrem et presam.

De qua ipsam aquam accipient permiserint ad claudendum, nos autem et nostri, teneamur facere vobis cequiam maiorem in termino de Nules, per quam dicta aqua discurrat et discurrere possit ad rigandum terminum de Nules predictum, nostris propriis missionibus et expensis, et ipsam cequiam maiorem tenere condirectam in termino de Nules, et mundare singulis annis nostris propriis missionibus et expensis.

Vobis tamen seu hominibus vestris, solventibus nobis cequiaticum antedictum, ut superius continetur, et homines vestri teneantur mundare braçallos sive filas, qui seu que de dicta cequia emanabunt.

Volumus etiam et constituimus, quod in dicta cequia populacionis nostre, quam nos facere debemus, sunt duo cequiarii qui custodiant aquam dicte cequie, ne aliquis eam devastet vel in vanum eiciat vel exsolvat de matre sive de cequia maiori; unus scilicet pro nobis, et alius pro vobis.

Sed cequiarius vester non habeat in termino dicte populacionis aliquem districtum nos quod possit videre et custodire, ne aliquis ipsam quam devastet.

Cequiarius vero dicte cequie nostre, vel baiulus dicte populacionis nostre, possint compellere et pignorare homines vestros intus in villa de Nules et extra, singulis annis, persolvendo cequiatico antedicto; et nos vel nostri non teneamur dare aliquid salarium cequiario vestro dicte cequie, nec vos nostro.

Et sic per nos et nostros promittimus attendere et complere predicta, ut superius continetur, et in aliquo non contravenire.

Ad hec ego, Guillermus Raymundi de Moncada predictus, recipiens a vobis dicto domino Rege donacionem et concessionem aque predicte, sub modis et condicionibus supradictis, et concedens ac laudans omnia et singula supradicta, promito vobis domino Regi, quod ego seu homines de Nules que de dicta aqua rigabunt, dabunt vobis et vestris singulis annis, duos solidos et medium racione cequiatici, pro unaquaque scilicet jovata terre, quam de dicta aqua rigabunt, pro quo cequiatico, cequiarius seu baiulus vester iamdicte populacionis, possint homines qui de dicta aqua rigabunt, compellere et pignorare ut superius continetur.

Et promitto etiam per me et meos, predicta omnia et singula attendere et complere, et in aliquo non contravenire nec permitere aliquo de hominibus de Nules contrafacere ullo modo.

Actum est hoc in Valencia, XIII kalendas septembris, anno Domini Mº. CCº. LXXº. tercio.

Sig+num Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Sig+num Guillermi Raymundi de Moncada predicti, qui hoc concedo et firmo.

Testes sunt: Petrus Ferrandi, Bernardus Guillermi de Entença, Petrus Martini de Luna, Carrocius dominus Rebolleti, Ferrarius de Liçana.

Sig+num Simonis de Sancto Felicio, qui mandato domini Regis et Guillermi Raymundi de Moncada predictorum, hec scribi fecit et clausit, loco, die et anno prefixis.