Noverint universi quod nos Jacobus Dei gratia rex Aragonum, Maioricarum et Valentie, comes Barchinone et Urgelli et dominus Montispesulani, per nos et nostros concedimus vobis universis et singulis probis hominibus et universitati Maioricarum, presentibus et futuris, imperpetuum, quod liceat vobis habere imperpetuum VI juratos, habitatores tamen civitatis Maioricarum et regni, et liceat eisdem juratis gubernare, et ministrare, et regere totam insulam, ad fidelitatem et comodum nostrum, et comune comodum universitatis.

Qui iurati possint eligere, habere et vocare consiliarios annuantim, quot et quos voluerint, et de omnibus que in illo ipsi jurati anno fecerint circa civitatem nostram et regimen civitatis, et insule, et habitatorum earumdem, ex officio suo cum consilio consiliariorum suorum qui simul cum dictis consiliariis vocati fuerint, erimus nos paccati, nec inculpabimus inde ipsos in aliquo, nec consiliarios eorum, nec aliquos quos de consilio demandaverint super aliquo facto quod fecerint, vel ordinaverint verbo, vel facto dum ipsi jurati et eorum consiliarii in hiis que ordinaverint, vel aministrare eos oportuerit fatiant juste.

Statuentes quod singulis annis in festo Nativitatis Domini, ipsi jurati qui pro tempore fuerint cum baiulo nostro insimul presente, et consentiente, et cum consilio consiliariorum suorum eligant, sex juratos habitatores civitatis et insule quos utiliores, et meliores viderint, et cognoverint secundum scientiam, et cognitionem eorum ad dictum offitium exercendum, nec propter iram, odium, amorem, parentelam, precium, promissionem, aliquem utilem ad hoc, secundum cognitionem eorum dimittant eligere, et illos sic ab ipsis electos nobis si presentes in regno fuerimus, vel baiulo nostro si absentes fuerimus, antequam aministraverint presentabunt qui cum in posse nostro, vel in posse baiuli voccatis, et presentibus probis hominibus civitatis jurabunt publice sicut inferius continetur.

Et aliquis juratorum non accipiat aliquod salarium, set gratias et sine aliquo pretio per illum annum quo electus fuerit gubernationi et aministrationi civitatis intendere teneatur; nec aliquis aliqua causa possit se excusare vel occasionem pretendere quin dicti offitii honus et laborem subeat et recipiat; et ille qui uno anno dictum offitium tenuerit, sequenti anno illud non teneat.

Et de uno hospitio unus tantum et non plures eligantur.

Et ipsi jurati teneantur jurare et consulere, tenenti locum nostrum, et baiulo et vicario, super omnibus quibus eos consulendum ab eis fuerint requisiti.

Qui jurati, in principio aministrationis sue istud fatient juramentum:

"Ego talis, promitto quod pro posse meo, et sciencia, salva in omnibus fidelitate et iure, et dominatione domini regis, procurabo utilitatem, et comune comodum civitatis, et regni Maioricarum, et habitatorum eiusdem, et vitabo inutilia et dampnosa, et non recipiam precium vel salarium; et ego et alii socii mei jurati fideles, et utiles consiliarios vocabimus, et in nostris consiliis habebimus, et in fine anni pro posse meo et scientia, omni ira, odio, timore, parentela, amore, servitio vel spe servitii, vel munere exclusis, cum juratis sociis meis presente baiulo et consentiente, alios sex probos homines civitatis et regni habitatores pro juratis eligemus, quos digniores cognoverimus, ad dictum offitium exercendum, nec assumemus jurisdictionem ordinariam nec arbitrariam, et custodiemus iura domini regis; et hec omnia sine fraude et dolo, juro per Deum, et sancta Evangelia manibus meis corporaliter tacta".

Volumus etiam quod annuatim sit miles unus juratus ex illis sex juratis.

Predicta autem omnia concedimus vobis, et vestris in perpetuum dum modo ipsi jurati bene, et fideliter in ipso officio se habuerint.

Data Valentie nonas julii anno Domini millesimo ducentesimo quadragesimo nono.

Signum + Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispessulani.

Testes sunt: G. de Angularia, G. de Aquilone, G. de Montechatano, Carrocius, R. de Guardia.

Sig+num Petri Andree, qui mandato domini regis, pro G. Scriba notario suo hec scribi fecit, loco die et anno prefixis.