Jacobus Dei gratia rex Aragonum, Maioricarum et Valentie, comes Barchinone et Urgelli et dominus Montispesulani.

Fidelibus suis baiulis, vicariis, curiis, justitiis, juratis, et aliis offitialibus et subditis nostris ad quos presentes pervenerint. Salutem et gratiam.

Cum nos ad mandatum summi pontificis imbuerimus ne aliquis de terra nostra sit ausus extrahere causa portandi ad aliqua loca sarracenorum ferrum, arma, lignamina, panem, ne aliqua alia victualia, et huiusmodi inibitionem per vos teneri et observari mandaverimus firmiter, ut in litteris nostris quas super hoc vobis misimus plenius continebatur; nunc autem significamus vobis quod nobis modo in Barchinona existentibus, probi homines comparuerunt coram nobis, et rogaverunt nos ut deberemus declarare eisdem, que sub nomine victualium intelligebamus.

Nos autem habito consilio cum fratribus predicatoribus, et minoribus, super predictis ita duximus ordinandum, quod nemo de terra nostra sit ausus ad aliqua loca terre vel dominationis soldani Alexandrie, aliquas merces nec aliquas alias res prohibitas vel non prohibitas deportare, nec etiam ad aliqua alia loca serracenorum deportare vel mittere ferrum, arma, lignamina, plumbum, peguntam, filum canabi, vel aliquid aliud de quo exarcia fieri possit, nec navem lignum vel aliquod vaxillum vendere sarracenis, nec deportare etiam vel mittere frumentum, ordeum, milium, panicium, adazam, fabas, cicera, nec aliquam farinam ipsorum bladorum vel aliquam aliam farinam.

Omnia vero alia possint ad terram regis Tunicii, et ad alia loca sarracenorum, excepta terra et dominatione dicti soldani Alexandrie libere deportare.

Mandantes vobis firmiter et districte, quatinus huiusmodi inibitionem nostram, faciatis ab omnibus inviolabiliter observari, ut superius continetur, et non contraveniatis nec aliquem contravenire permitatis si de nostri confiditis gratia vel amore.

Nos autem intelligimus pro huiusmodi mandato nostro inibere quin domini navium lignorum et aliorum vaxellorum possint in eorum navibus lignis et aliis vaxellis, portare victualia quecumque eis, et marinariis necessaria, necnon et mercatoribus in eisdem euntibus, secundum quod viaticum fuerit quod facere debebunt, iuxta cognitionem duorum proborum hominum ripparie, quos vos ad hoc legales scilicet eligatis, nec quin possint etiam portare in eisdem navibus lignis et vaxellis aliis peguntam, et clavos ad opus eorum navium et lignorum ac etiam aliorum vaxellorum, et arma ad ipsorum deffensionem, iuxta similiter cognitionem ipsorum duorum proborum hominum, quod vos ad hoc ut dictum est eligetis.

Data Barchinone tercio nonas augusti anno domini millesimo ducentesimo septuagesimo quarto.