In Dei nomine.

Manifestum sit omnibus presentem paginam inspecturis, quod nos infans dompnus Jacobus, filius illustrissimi domini Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani, heres regni Maioricarum et Montispesulani, per nos et omnes heredes ac successores nostros cum presenti publica carta omni tempore valitura, concedimus, laudamus, approbamus et perpetuo confirmamus, vobis dilectis et fidelibus nostris civibus, et aliis probis hominibus populatoribus, et habitatoribus in civitate, et tota insula Maioricarum, comorantibus tam presentibus quam futuris per secula cuncta, omnes franquitates et libertates a domino illustrissimo rege patre nostro predicto vobis concessas ut in instrumento illarum franquitudinum dinoscitur contineri.

Item concedimus et perpetuo laudamus et confirmamus vobis et vestris succesoribus imperpetuum, omnes cavallerias quas ibi habetis pro ut eas tenetis.

Concedimus etiam approbamus laudamus et perpetuo confirmamus vobis et vestris perpetuo, omnes dominationes et concessiones, vobis factas ab eodem illustrissimo domino rege patre nostro, seu ab aliquibus suum locum tenentibus pro ut eas tenetis et possidetis.

Mandantes vicariis, baiulus, offitialibus, et locum nostrum tenentibus, et aliis omnibus universis subditis nostris, tam presentibus quam futuris, quod hanc nostre cartam concessionis, et confirmationis a nobis spontanee vobis factam ratam habeant atque firmam perpetuo, et observent, et faciant ab omnibus inviolabiliter observari, nec contraveniant vel aliquem venire permittant, si de nostri confidant gratia vel amore.

Et ut melius hec omnia predicta et singula vobis a nobis compleantur, et attendantur, juramus in Deum et super fancta quatuor euvangelia manibus nostris propriis corporaliter tacta, hec omnia predicta et singula rata et firma habere, et predicta omnia ut superius scripta sunt attendere et complere nec aliquo contravenire.

Et ut hec predicta manus robur vobis obtineant firmitatem, sigillo nostro proprio presentem cartam munimine fecimus sigillari.

Data Maioricarum, in ecclesia sancte Eulalie, duodecimo kalendas septembris, anno ab incarnatione Domini millesimo ducentesimo quinquagesimo sexto, et mandato nostro scripta.

Signum + infantem Jacobi, illustris regis Aragonum filii, et heredis regni Maioricarum et Montispessulani, qui predicta firmamus et laudamus.

Testes sunt, Petrus Nuniz, Ferrandus Yanes, Berengarius de Tornarima, Raymundus Dei gratia maioricensis, Blaschus Petri, Aries Yannes, Arnaldus de Turriliis, Ferrarius Garçes de Roda, Rodericus Yanes, Vitalis de Bisull[e]o legista, Martinus Petri Desi.

Sig+num Bernardi de Luçha, scribe domini infantis Jacobi illustris regis Aragonum filii et heredis regni Maioricarum et Montispessulani, qui hec scribi fecit mandato eiusdem, loco die et anno prefixis.