Noverint universi, quod cum in compositione facta inter nos Jacobum, Dei gratia regem Maioricarum, comitem Rossilionis et Ceritanie, et dominum Montispesulani, et illustrem Petrum regem Aragonum, karissimum fratrem nostrum, super petitione et questione quam dictus illustris rex Aragonum nobis movebat, et faciebat de regno Maioricarum, et de insulis ei adiacentibus, et de comitatibus Rossilionis, Ceritanie et Confluenti, et Vallis Spirii, et de Cauquolibero, et de Montispesulano, cum dominatione et destrictu eiusdem, nos Jacobus rex Maioricarum predicto in instrumento dicte compositionis, retinuerimus nobis et nostris bovaticum in pred[ict]is terris, et etiam retinuerimus nobis quod in regno Maioricarum, et insulis ei adiacentibus possemus ponere novam lezdam et pedagium, et alia plura similiter retinuerimus et especifficaverimus in instrumento dicte compositionis seu transactionis, et cum tempore dicte compositionis actum fuerit inter nos, et dictum illustrem regem Aragonum, quod sindici seu procuratores ab universitate ville Perpiniani, et ville Podii Cerdani, et ab universitate civitatis Maioricarum, constituti, et quod sindici seu procuratores similiter ab universitate civitatis Barchinone, et civitatis Ilerde, et civitatis Gerunde, constituti, promitterent sub virtute juramenti, et homagii se servaturos dictam compositionem, et securaturos ipsam compositionem, teneri facere et servari, pro ut in instrumentis inde confactis hec lacius continetur, et ne propter predictas retenciones quas fecimus in dicta comisitione videlicet de bovatico, et de lezda nova, et pedagio aponendo in predictis locis, et propter omnia alia in instrumento dicte compositionis contenta audeatur posse aut possit hominibus civitatis, et tocius insule Maioricarum et franchitatibus, et libertatibus eorum, nunc vel in futurum, ullum preiuditium generari, maxime propter promissionem et juramentum ac homagium quod ex licentia et mandato nostro, habent et debent sindici seu procuratores civitatis, et insule Maioricarum, constituti, nomine universitatis dicte civitatis, et insule, prestare illustri regi Aragonum predicto, super servandis predicta compositione, et contentis in instrumento eiusdem.

Nos volentes indempnitati et prejuditio hominum dicte civitatis et insule Maioricarum, et franchitatum ac libertatum, eorum obviare et benigniter providere, ex certa scientia cum hoc presenti instrumento imperpetuum valituro, confitemur et recognoscimus vobis Petro de Turri militi, Bernardo Valentum, Reonardo de Mal Bosch, Berengario de Guardiola, Raymundo de Guaellis, et Bernardo Guillermi, juratis civitatis Maioricarum nomine vestro et tocius universitatis civitatis, et insule Maioricarum, stipulantibus et recipientibus quod pro predictis per nos retentis in supradicta compositione facta inter nos et dictum illustrem regem Aragonum, nec pro predictis promissione, juramento, et homagio, per dictos sindicos dicte civitatis et insule Maioricarum, prestandis dicto illustri regi Aragonum, super predicta compositione, et contentis in instrumento ipsius servandis, non fuit intencionis nostre, nec intelleximus nec intendimus, nec modo aliquo volumus posse intelligi quod vobis aut universitatis civitatis et insule Maioricarum tam presentibus quam futuris nec franchitatibus, aut libertatibus vestris, posset vel possit nunc vel in futurum prejuditium aliquod generari, nec etiam fuit intentionis nostri nec est, imponendi aliquam servitutem seu jugum servitutis in vobis nec in hominibus universitatis dicte civitatis et insule supradicte, presentibus et futuris, nec in bonis aut rebus eorum, immo ad tollendum et removendum omne dubium predicti prejuditii et servitutis, et ex certa scientia per nos et nostros laudamus, aprobamus, et confirmamus vobis predictis juratis, probis hominibus, et universitati predicte civitatis, et tocius insule Maioricarum, presentibus et futuris, franchesias omnes et libertates per dominum jacobum, bone memorie regem Aragonum patrem nostrum vobis datas et concessas, et per nos vobis laudatas et confirmatas, pro ut in instrumento quod a dicto domino rege Aragonum quondam patre nostro, et a vobis inde habetis plenius et lacius continetur.

Volentes et concedentes vobis dictis juratis pro vobis et universitate dicte civitatis, et insule, stipulantibus et recipientibus, quod nunc et etiam post factam dictam obligationem promissionem sacramentum, et homagium predicto illustri regi Aragonum, fratri nostro, omnes libertates et franchesie vestre, et generaliter omnia alia iura vestra, sint et remaneant integra et lllesa, ac penitus in eternum illibata, in eo statu in quo erant ante tempus supradicte compositionis.

Et ad maiorem firmitatem omnium predictorum presentem cartam bulla nostra plumbea fecimus comuniri.

Data in Maioricarum, quarto idus febroarii anno Domini millesimo ducentesimo septuagesimo nono.

Signum + Jacobi Dei gratia regis Maioricarum, comitis Rossilionis et Ceritanie, et domini Montispessulani.

Testes snt Guillermus de Caneto, Bernardus de Ulinis, Gueraldus de Rico vicarius Maioricarum, Pontius de Guardia, Berengarius de Ulinis, Arnaldus Baiuli judex dicti domini regis, Berengarius Arnaldi de Insula miles, Dalmatius de Sancto Michaele, et Raymundus de Podio de Pardinis miles.

Sig+num Petri de Calidis, qui mandato dicti domini regis, hec scribi fecit et clausit loco die et anno prefixis.