Hoc est translatum fideliter factum XIIIIº kalendas decembris anno Domini Mº CCCº duodecimo, sumptum a quodam privilegio pergameneo sigillato cereo pendenti, illustrissimi domini Jacobi inclite recordacione regis Aragonum, cuius series sic habetur:

Noverint universi quod nos Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros damus et concedimus vobis dilecto et fideli nostro Jacobo de Rocha, procuratori hospitalis sive monasterii sancti Vincentii Valencie et vestris successoribus pro [iuribus]ipsius monasterii et ipsi monasterio imperpetuum, ac etiam statuimus quod semper de cetero annuatim celebrentur nundine in villa Castilionis campi de Burriana, que incipiant octava die ante festum sancti Luche et durent per decem dies sequentes. Quasquidem nundinas vobis perpetuo concedimus liberas atque franchas.

Recipimus etiam in nostra proteccione, custodia, comenda et guidatico speciali omnes et singulos homines et mulieres ad dictas nundinas venientes, cum omnibus rebus et mercibus quas ibidem aportaverint ad vendendum, et ibidem etiam emerint, in veniendo, stando et redeundo.

Ita scilicet quod non capiantur, detineantur, marquantur, pignorentur nec agraventur aliqua racione, nisi proditores fuerint manifesti vel homicide, vel encartati, aut debitores vel fideiusores pro aliis constituti, nec etiam si debitores vel fideiussores pro aliis constituti fuerint, nisi prius in ipsis fatica inventa fuerit de directo.

Mandantes baiulis, justiciis, juratis et aliis officialibus et subditis nostris presentibus et futuris, quod huiusmodi guidaticum nostrum firmum habeant et observent et faciant observari, et non contraveniant nec aliquem contravenire permitant aliqua racione.

Quicumque autem contra dictum guidaticum nostrum venire attemptaverit, iram et indignationem nostram et penam quingentorum morabatinorum se noverit incursurum dampno illato primitus et plenarie restituto.

Datum Ilerde VIIº idus madii anno Domini Mº CCº LXº nono.

Signum + Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: [1ª col.] Raymundus de Montecatheno. [2ª col.] Guillermus Raymundi de Montechateno, Jacobus de Cervaria. [3ª col.] Guillermus de Angularia, Raymundus de Urgio.

Sig+num Simonis de Sancto Felicio, qui mandato regis predicti hec scribi fecit, cum raso et emendato in IIª linea, ubi dicitur "procuratoribus", et in VIIª linea ubi dicitur "procuratoribus", et clausit loco die et anno prefixis.

Sig+num Johannis de Capestayn auctoritate regia [publici] Valentie notarii, testes. Sig+num Guillermi de Olivaria notarii publici Valentie testis.

Sig+num Arnaldi de Fonte, justicie Valentie, qui viso originali privilegio, huic translato auctoritatem suam prestitit et decretum.

Sig+num Johannis de Miralles, publici Valentie notarii et curie eiusdem pro Guillermo Scribe, qui auctoritatem dicti justicie, eius iussu in hoc translato apposuit et scripsit.

Sig+num Jacobi de Purpuris, publici Valentie notarii, qui hoc fideliter translatavi et a suo originali comprobavit [et clausit cum raso] in prima linea [ubi dicitur] "nos".