Noverint universi quod nos Jacobus, Dei gratia rex Maioricarum, comes Rossilionis, Ceritanie, et dominus Montispesulani, ad instantem suplicationem nobis factam per juratis Maioricarum, nomine tocius universitatis Maioricarum, cum emptores carnagii quod consuevit dari in portione quam nobilis Nuno bone memorie habebat in Maioricarum, vexarent et affligerent illos qui dictum carnagium dare debebant, volentes exaudire dictam suplicationem et utilitati dicti universitatis providere de gratia spetiali, per nos et omnes nostros successores presentes et futuros volumus, concedimus, et remitimus vobis juratis Maioricarum, pro tota dicta universitate Maioricarum, quod dictum carnagium nunquam levetur, nec petatur in Maioricarum, per nos vel successores nostros, nec per alios, immo tota dicta universitas tam presens quam futura sit perpetuo a prestatione dicti carnagii libera et immunis, non obstante exceptione vel retentione per nos facta de dicto carnagio in instrumento franquitatum vestrarum.

Et nos vel successores nostri, vel alii, nunquam inquietabimus vel inquietari fatiemus seu permitemus dictam universitatem ad prestandum carnagium supradictum.

Mandantes baiulis, vicariis, et omnibus aliis offitialibus nostris presentibus et futuris, cuiuscumque gradus et conditionis existant, quod hanc concessionem et remissionem firmam habeant et observent, et eam fatiant ab omnibus inviolabiliter observari, si de nostra confidunt gratia vel amore.

Pro hac enim concessione, et remissione, confitemur nos habuisse et recepisse a vobis dictis juratis, solventibus pro tota dicta universitate Maioricarum, decem et octo milia solidos regalium Maioricarum minutorum monete perpetue.

In cuius rei testimonium presentem concessionem fecimus sigilli nostri pendentis munimini roborari.

Datum Perpiniani, septimo decimo kalendas augusti, anno Domini millesimo trecentesimo nono.

Constat de dictione fecimus supra scripta in undecima linea.

Ego Laurentius Plasensa, scriptor prephati domini nostri regis, ipsius mandato hanc cartam scribi feci et clausi, et subsignavi meo publico et solito sig+no.