Noverint universi, quod nos Jacobus Dei gratia rex Maioricarum, comes Rossilionis et Ceritanie, et dominus Montispesulani, recognosimus vobis Bernardo de Turicella militi, Guillermo de Buadella, Guillermo de Podio d'Orphila, Petro de Quintanis, Jacobo de Valle, et Petro de Sarriano, juratis Maioricarum, quod per predecessores vestros et vos fuit a nobis supplicando petitum instanter, et pluries, ut permitteremus et concederemus vendi alcheriam vocatam sanctam Eulaliam, que est in terminis civitatis Maioricarum.

Quam alcheriam, cum pertinentiis suis, nobilis Nuno Santii recolende memorie, amore Dei pro salute anime sue dedit hospitali pauperum sancte Eulalie dicte civitatis Maioricarum.

Cuius hospitalis dictus nobilis Nuno, fundator et patronus fuit, et suo iuri patronatus nos juste successimus.

Cuius alcherie et pertinentiarum suarum venditio fieri postulata fuit oportune pro evidenti utilitate dicti hospitalis, eo quia ex fructibus dicte alcherie nichil aut modicum supererat, deductis expensis quas maximas requirebat in cultura et aliis, et ex ea precium satis pingue inveniretur ex quo poterunt emi dicto hospitali census, qui longe utiliores et fructuosiores erunt. Qua alcheria predicta, et fructus qui habebantur, et poterant, ac consueverunt ex ea haberi, et super hiis facta diligenti inquisitione vera comperta sunt per omnia ut continet supplicatio et postulatio minoratam.

Quare intendentes comoditatibus et avenientis dicti hospitalis cuius ius patronatus ad nos pertinet a priora et utiliora prospicientes concessimus ut alcheria predicta cum suis pertinentiis venderetur ex causa predicta.

Unde vos jurati predicti, de nostro beneplacito et permissu illam exposuistis, et tanquam venalem fecistis subastari per preconem publicum palam et publice ac pluries et diversis temporibus, et nulla persona inventa fuit que pro ea tantum precium offerret quantum Petrus Burguesii civis Maioricarum, qui pro ea obtulit, immo dedit mille libre realium Maioricarum minutorum.

Quarum precio sibi tanquam plus offerenti dictam alcheriam vendidistis, et tradidistis vel quasi, cum omnibus iuribus et pertinentiis suis, servata omni sollempnitate que in venditionibus talium rerum consuevit, et debet servari, pro ut in carta ipsius venditionis facta undecimo kalendas januarii anno presenti, subsignata per Nicholaum de Sancto Justo, notarium publicum Maioricarum et curie locumtenentis eiusdem seriosius continetur.

Idcirco dictam vendicionem de dicta alcheria, et eius iuribus et pertinentiiis ex dicta causa utili, factam de nostri licentia et permissu, habentes gratam et ratam ipsam, et obligationem pro eius evictione factam tibi et tuis de censibus et aliis emendis ex precio supradicto, per nos et nostros laudamus et approbamus, confirmamus et ratifficamus tibi dicto Petro Burgesii, et tuis perpetuo, nunc ut tunc, pro ut plenius continetur in carta venditionis predicta, et sicut melius et utilius potest scribi,dici, intelligi, et interpretari, ad utilitatem et securitatem et bonum tui dicti petri Burguesii et tuorum.

Preterea pro bono et utilitate dicti hospitalis, de spetiali gratia, et ex pacto habito in tractatu dice venditionis et ante volumus et concedimus per nos et nostros, quod ex dictis omnibus mille libre habitis pro precio dicte alcherie, vos dicte jurati aut vestri successores nomine, et ad opus dicti hospitalis ematis et possitis emere in realenco nostro in et super aliquibus prediis et bonis que non teneantur a nobis sub canone vel directo dominio census et alios redditus meliores et tuciores, quos invenire et habere poteritis pro precio dictarum mille libre, in alodio vel in rebus feudalibus, aut emphiteoticalibus, salvo in omnibus et per omnia iure et dominio eius vel eorum aliquibus vel pro quibus tenebuntur, super quibus ex certa scientia dispensamus, et licentiam damus et concedimus, non obstante constitutione seu prohibitione que cauntur, quod census vel huiusmodi bona a laycis vel dominio suo non possint in tale dominium transfferri vel amortitzari, nam huiusmodi nostra dispensatione et licentia nichil aut modicum nostro domino et iuri regio derogatur.

Qua dicta alcheria cum pertinentiis suis a posse et dominio eiusdem hospitalis translata est titulo venditionis, in ius et dominium laycorum, videlicet dicti Petri Burgesii et suorum.

Quare statuimus firmiter ac mandamus locum nostrum tenentibus, vicariis, baiulis, et aliis offitialibus nostris presentibus et futuris, quatenus huiusmodi nostram licentiam et dispensationem, et cetera omnia et singula suprascripta firma habeant et observent, et ab omnibus fatiant inviolabiliter observari.

In quorum omnium fidem pleniorem, presentem cartam nostro sigillo pendenti iussimus communiri.

Quod est actum in civitate Maioricarum, decimo kalendas januarii anno Domini millesimo trecentesimo decimo.

Testes huius rei sunt, Jacobus de Muredine, Berengarius de Sancto Johanne, Berengarius de Ulmis, Berengarius de Collo, milites, Francischus Dalmacii et Berengarius Bassa, judices dicti domini regis.

Ego Laurentius Plasensa, scriptor prefati domini nostri regis, ipsius mandato hanc cartam scribi feci et clausi, et subsignavi meo publico et solito sig+no.