Noverint universi quod nos Jacobus Dei gratia rex Maioricarum, comes Rossilionis et Ceritanie, et dominus Montispesulani, circa publicas utilitates et comoditates subditorum nostrorum iugiter intendentes, et contraria radicitus extirpari, volentes ea potissime que sunt equitati et bonis moribus obvia et in detrimentum animarum vertuntur, omnibus ad benefatiendum tribuentes exemplum, nostra liberalitate et de gratia spetiali, et privilegio nostre benivolentie, cum hac nostra carta perpetuo firmiter valitura, damus et indulgemus civibus nostris Maioricarum, et ceteris omnibus regnicolis regni Maioricarum, et insularum Minoricarum et Evisse, et aliarum adiacentium dicto regno habentibus, et qui habebunt pro tempore predia urbana, et rustica, iura, redditus, vel alia quecumque bona in quibus nos habeamus, habuerimus, et debeamus habere faticam in civitate maioricarum et eius territorio et terminis, et aliis locis regni, et insularum predictarum quecumque sint et ubicumque, quod quicumque emerit, accaptaverit, vel quocumque titulo habuerit de ipsis prediis, censibus, iuribus, et redditibus et aliis bonis.

Quorum fatica ad nos et ius nostrum pertinere noscatur, emptor vel adquisitor qui habuerit baculum fiscalem, aut fecerit empcionem vel acapitum, vel quocumque alio modo eam rem habuerit faticam inmediate habeat absque precio aliquo, et qualibet conditione reiecta.

Salvo quos nos et nostri successores, et procuratores nostri possimus nobis et ad opus nostri rem ipsam venditam, vel alio modo alienatam retinere, pro tanto seu simili precio quo fuerit vendita, vel alio modo alienata omni fraude cessante, sic quod illam nulli alii vendere aut donare possimus.

Salvo semper nobis et nostris directo dominio, laudimio et foriscapio, et in aliis omnibus iure nostro.

Hec autem statuenda et indulgenda, seu concedenda duximus, quia credimus, immo videmus esse peccatum recipere aliquid pro huiusmodi faticis, nam redundat in diminutionem valoris et precii rerum venditarum, et alienatarum, et detrimentum non modicum venditorum et alienatorum.

Mandantes tenentibus locum nostrum, vicariis, baiulis, et aliis offitialibus, qui nunc sunt et erunt pro tempore nostris, et nostrorum omnium successorum in civitate et regno Maioricarum, et insulis adiacentibus dicto regno, ut huiusmodi nostram constitucionem et gratiam perpetuo firmam habeant et observent, et ab omnibus in possessionibus et aliis bonis et iuribus in quibus faticam habemus et habuimus factenus fatiant firmiter et inviolabiliter observari,

In quorum rei testimonium presentem cartam nostra bulla plumbea pendenti iussimus comuniri.

Quod est actum in civitate Maioricarum, sexto idus januarii anno Domini millesimo trecentesimo decimo.

Testes huius rei sunt, Jacobus de Muredine, Berengarius de Sancto Johanne, milites. Et Petrus de Matis, Raymundus Plasense thesaurarius dicti domini regis, Francischus Dalmatii et Berengarius Bassa, judices eiusdem domini regis.

Ego Laurentius Plasensa, scriptor prefati domini regis ipsius mandato hanc cartam scribi feci et clausi, et subsignavi meo publico et solito sig+no.