In Christi nomine.

Noverint universi, quod nos Jacobus Dei gratia rex Aragonum, Maioricarum et Valencie, comes Barchinone et Urgelli et dominus Montispesullani, volentes adimplere dotacionem cathedralis ecclesie Valencie quam Domino faciente eripuimus a manibus paganorum, ad quam dotacione eramus obligati tam ex speciali promissione a nobis emissa quam ex debito devocionis et fidei, damus et concedimus itaque et oferimus domino Deo et beate Marie, et predicte ecclesie et vobis venerabili episcopo et canonicis eiusdem, decem milia bisanciorum argenti boni et recti ponderis, de quibus ematis possessiones ad opus et sustentacione vestram et successorum vestrorum inperpetuum, quibus decem milibus bisanciorum vobis semel solutis iterum eos a nobis exhigere non possitis nec nostris.

Item, per nos et omnes successores nostros damus vobis inperpetuum omnes mesquitas et ciminteria publica seu [.....] ultra duodecim vasa, que quondam fuerunt sarracenorum in civitate et diocesis Valentie et in adiacentis sitis, excepto ciminterio in quo assignavimus generalem forum Valencie fieri, sic determinatum est in consuetudine Valencie.

Mesquitas etiam et ciminteria singula et universa, parva et magna, aliorum locorum infra fines episcopatus Valencie, nobis predicto episcopo et predicte ecclesie donamus in perpetuum, cum ad manus pervenerint christianorum.

Preterea donamus et promittimus assignare singulis capellanis in singulis ecclesiis parrochialibus in quibus hordinati fuerint deservientibus singulas domos et singulos ortos competentes, qui capellani habeant primiciis illorum locorum de quibus sibi provideant et suis ecclesiis.

Item, donamus ad opus vestrum duas jovatas terre pro ortis circa Valenciam per divisores Valencie vobis iam assignatas et terminatas.

Item, donamus vobis et predicte ecclesie imperpetuum alfondicum illum cum suis pertinenciis in quo manebat Arnaldus de Rocha Folio, situm ante sedem.

Et domos similiter donamus vobis et predicte ecclesie, in quibus manebat frater Gregorius et continenatur cum domibus de Aventegami a porta turris, videlicet usque ad domos Johannis de les Celles, ita quod turris intelligatur infra istas afrontaciones, quam habeatis sic modo eam possidetis, set dictam turrim amplius sic modo est elevare non possitis.

Insuper absolvimus et difinimus vobis et vestris successoribus inperpetuum, duas partes omnium decimarum, videlicet fructum terre et animalium et piscacionum maris tocius episcopatus Valencie.

Item, deducta primo parte nostra quam ibi accipere debemus, difinimus vobis et vestris imperpetuum duas partes decimarum omnium piscacionum maris et de Albufera, et de furnis et molendinis factis et faciendis, et hoc absolvimus et difinimus de omnibus possessionibus quas nunc tenent statim cum ad manus pervenerint christianorum.

Interim autem de omnibus redditibus quod a sarracenis quoquomodo percipimus vel percipere debeamus deducatur decima, cuius decime habeatis vos duas partes quas de presenti vobis absolvimus et difinimus imperpetuum.

Cum autem possessiones eorum in quocumque loco dicti episcopatu ad manus christianorum pervenerint, tunch de tota decima habeatis vos duas partes imperpetuum, sicut de aliis possessionibus quas nunc possident christiani est superius difinitum.

Limites vero episcopatus Valencie esse volumus et perpetuo, per nos et nostros difinimus a finibus termini castri de Almenara, qui dividit terminum cum Murvedre, usque ad Biar, vel ultra in quantum nostra vel nostrorum adquisicio ulterius dante Domino protendetur.

Ad hec nos F. Dei gracia episcopus Valencie, et totum capitulum eiusdem, per nos et omnes successores nostros, consensu et consilio domini P. Dei gratia terrachonensis archiepiscopi, damus in feudum perpetuum vobis domino Jacobo, illustri regni predicto et successoribus vestris in regno Valencie succedentibus, terciam partem omnium decimarum terrarum et possessionum vobis subiectarum in civitate et episcopatu Valencie, et terciam partem piscacionim maris et Albufere et animalium.

In hoc autem non intelligimus dare vel concedere vobis ves vestris, decimam que percipi debet de rebus sive hereditatibus militum, clericorum, seu locorum religiosorum. Illam enim, cum vendicare poterimus nobis et successoribus nostris perpetuo integre retinemus.

Similiter concedimus vobis et vestris in feudum perpetuum, omnes decimas tocius porcionis reddituum vel proventuum vestrorum que vos percipitis vel percipere debetis infra dictum episcopatum in omnibus furnis et molendinis, et terciam partem in piscacione maris et albufere Valencie, salva parte vestra quam recipitis in dicta Albufera, que pars vobis et vestris remaneant indecimata. Et salva parte tercia vobis et vestris decime eorum, que alie persone recipiant vel recipiunt in predictis furnis et molendinis.

Hec autem habeatis et possideatis vos et successores vestri imperpetuum ad feudum, pro ecclesia Valencie, et ex hoc sitis fideles et defensores personarum et iurium nostrorum et nostrorum omnium successorum et supradicte ecclesie, sine omni alio servicio, quod nobis vel ecclesie facere non teneamini.

Item, per nos et omnes successores nostros absolvimus et perpetuo difinimus omnes alias pacciones quas usque in hodiernum diem dicte ecclesie vel domino archiepiscopo vel nobis, nomine dicte ecclesie pro eius dotacione aliquo modo fecistis.

Et specialiter difinimus vobis et omnibus possidentibus omnes hereditates, domos, ortos, et possessiones que tempore sarracenorum ad eorum mesquitas aliquas in toto regno Valencie pertinebant vel pertinere debebant.

Et de speciali promissione qua super dotacione ecclesie, et super donacione dictarum domorum, ortorum, et hereditatum sive possessionum mesquitarum dicte ecclesie aliquo fecistis, remittimus et absolvimus vobis et vestris et imperpetuum difinimus.

Datum Barchinone quarto nonas novembris anno Domini Mº CCº XLº primo.

Sig+num Jacobi, Dei gratia regi Aragonum, Maioricarum et Valencie, comiti Barchinone et Urgelli et domini Montispesullani.

Huius rey testes sunt: [1ª col.] G. de Entença. [2ª col.] Eximinus de Focibus. Asaltus de Gudal. [3ª col.] Berengarius de Cervaria. Ferrandus Garçez de Roda.

Sig+num F. miseracione divina episcopi Valencie, qui hoc laudo et firmo.

Sig+num magistri M. archidiaconi Valencie, qui hoc laudo et firmo. Sig+num magistri B. de Solerio, canonici Valencie qui hoc firmo.

Ego Bernardus de Vilario canonicus Valencie me subscribo. Ego Johannes Montisonis canonicus Valencie subscribo. Ego Berengarius de Tarragona canonicus Valencie me subscribo.

Sig+num Guillermi Scribe, qui mandato domini regis et episcopi predictorum, hec scripsi fecit loco die et anno prefixis.

Lecta fuit domino regi et episcopo.