Jacobus, Dei gratia rex Aragonum, Valentie, et cetera. Nobili et dilecto Petro de Queralto, gerentivices procuratoris in regno Valentie pro inclito infante Alphonso, carissimo primogenito et generali procuratore nostro, comite Urgellensi. Salutem et dilectionem.

Adeuntes presentiam nostram Guillermus de Minorissa et Dominicus de Claramonte, per juratos et universitatem civitatis Valentie ad nos nuntii destinati, exposuerunt nobis humiliter necessitatem eminentem quam super indigentia aquarum patitur universitas supradicta, et quod provisio per nos facta nullatenus predicte civitati posset sufficere.

Nos igitur, certificati ad plenum de immensa neccessitate predicta, volentes scandalis et futuris periculis obviare, que, occasione ipsius aque predicte civitati Valentie inde tantam neccessitatem et indigentiam pacienti possent succrescere; sic in premissis deliberato consilio duximus providendum, quod cessante provisione per nos facta, domini et habitatores locorum de Petralva, de Benaguacir, de Villamarxant et de Ripa-Rubea, ex presenti provisione nostra deinde recipiant quatuor diebus et quatuor noctibus continuis totam aquam, quam ipsi domini et habitatores predictorum locorum recipiunt seu recipi faciunt a rivo de Godalaviar; et habitatores civitatis Valentie aliis quatuor diebus et quatuor noctibus subsequentibus, et sic successive. Quam quidem aquam recipiant habitatores civitatis predicte in açutis vel in almenariis cequiarum dictorum locorum in loco ubi cum minoribus sumptibus recipi valeat.

Volentes quod ex hoc nullum habitatoribus seu universitati civitatis predicte, nec dominis seu hominibus locorum predictorum in proprietate seu possessione preiudicium generetur, immo ius eorundem in predictis salvum remaneat et illesum; nec id pro usu contra dictos homines seu habitatores locorum predictorum valeat allegari, et quod presens provisio nostra servetur quamdiu duraverit necessitas supradicta.

Quare vobis dicimus et mandamus, quatenus hanc provisionem et ordinationem nostram observetis et observari faciatis iuxta presentis littere nostre seriem et tenorem, nec aliquem contravenire permittatis aliqua ratione.

Datum Gerunde tertio nonas julii anno Domini M. CCC. XXI.