Manifestum sit omnibus, quod nos Jacobus Dei gratia rex Aragonum et regni Malioricarum, comes Barchinone et Urgelli et dominus Montispesulani, cum presenti carta perpetuo valitura per nos et omnes successores nostros donamus, concedimus, et confirmamus et laudamus inperpetuum, domino Deo et vobis fratri P. Ferrandiz in cismarinis partibus sancte domus Hospitalis Jherosolomitani maximo preceptori, et aliis magistris et fratribus Hospitalis Jherosolomitanis presentibus et futuris, castrum et villam de Cervaria.

Ita quod ab hac die in antea per puram concessionem, donacionem et confirmacionem nostram predictam, castrum et villam habeatis, teneatis, possideatis et explectetis perpetuo, franqum et liberum et quietum, per propriam hereditatem vestram, franquam et liberam, sine aliquo retentu quod ibi non facimus ullomodo, ad dandum videlicet comutandum, impignorandum, alienandum, vendendum, et ad omnes vestras voluntates cuique volueritis faciendas inperpetuum, cum introhitibus et exitibus, cum planis et montanis, cum rivis, cum aquis, herbis, pratis, pascuis, cum lignis et cum terminis et pertinenciis suis, cum molendinis et furnis, et cum omnibus omnino termino terminis et directis, que ad dictum castrum et villam pertinent et pertinere debent, vel unquam in tempore sarracenorum abuit et possedit, vel eidem pertinent vel pertinuerunt de consuetudine atque iure.

Mandantes firmiter universis nostris subditis, tam presentibus quam futuris, quod hanc donacionem nostram firmam abeant et observent, et faciant perpetuo firmiter observari, et non contraveniant in aliquo si confidunt de nostri gracia vel amore.

Datum Barchinone X kalendas januarii anno Domini Mº CCº XXX quinto.

Signum + Jacobi Dei gratia regis Aragonum et regni Maioricarum, comitis Barchinone et Urgelli et domini Montispesulani.

Huius rei testes sunt: [1ª col.] Bernardi Guillermi, Assalitus de Gudal. [2ª col.] F. de Sancto Martino, G. de Montecluso, G. de Cervilione. [3ª col.] P. Eximini de Valterra, Ferrandus Perez de Pina, Sancius de Vallibus.

Sig+num Guillermi Scribe, qui mandato domini regis pro domino Berengario, barchinonense episcopo cancellario suo hanc cartam scripsit.