In Dei nomine et eius gratia.

Manifestum sit omnibus quod nos, Guillermus Raymundus de Viella, cupiens introducere populum christianum in castro qui vocatur Vilafamez, ad laudem et honorem et servitium Dei Salvatoris nostri et beate Marie Virginis, cum consensu et auctoritate domini regis, cum hac presenti carta firmiter perpetuo valitura, donamus, laudamus et concedimus vobis, Dominico Ballistario de Mora, et Arnaldo de Cabrera, Guillermo Guitardo, Martino de Loça et Guillermo Gomiz, et vobis omnibus universis populatoribus de castro quod vocatur Vilafamez, hominibus et feminis que ibi estis nunc, vel in antea veneritis [ad] populandum in dicto castro, omnique progeniei et posteritate vestre, totam hereditatem, domos, vineas et ortos de dicto castro et de termino sui, franchas, liberas et quitias, ad dandum, vendendum, inpignorandum, modo quolibet alienandum, ad omnes vestras vestrorumque voluntates perpetuo faciendas, exceptibus militibus atque sanctis.

Item, donamus vobis et vestris perpetuam et continuam franchitatem ab omni peyta, paria, questia, tolta, forcia, mensuratico, monedatico, bovaticho, omnique mala consuetudine et usu, statutis et statuendis.

Sitis etiam vos et vestri successores franchi, liberi et inmunes, intus termini dicti castri, ab omni pedagio, lezda, portagio, que non detis de vestris rebus propriis.

Et etiam ingressus et egressus, erbas et paschuas, venationes et caças quolibet generis, et arbores fructiferos et infructiferos, et omnes vestras hereditates, franchas, liberas et quietas, et inmunes, et alia que ad usum hominis pertinent universa.

Tamen retinemus nobis et nostris, vel quolibet domino qui fuerit de dicto castro, ut vos et vestri teneamini facere hostem et cavalcatam, cum expensa vestra propria spatio triginta dierum, per totum regnum Valentie.

Retinemus etiam ad opus castri vetatum unumque quondam in tempore serracenorum asignatum fuit.

Damus insuper et concedimus vobis et posteritati vestre, ut sitis populati et semper habeatis forum Cesarauguste, et eo utamini et per ipsum vos manuteneatis, regatis et deffendatis, et adinvicem in possessionibus hereditatum et in demandis et casibus vestrisque usibus et contractibus universitatis [?].

Recipientes vos omnes singulos, presentes et futuros, in mea fide et legalitate, et semper habebimus curam et sollicitudinem de vobis, sicut de nostris fidelibus et legalibus hominibus et vassallis.

Actum fuit hoc IIIº kalendas septembris anno Domini millessimo ducentesimo XLº primo.

Sig+num Guillermi Raymundi de Viella, qui hanc cartam laudo et confirmo testesque firmare rogo.

Testes Guillermus de Lerida et Bernardus Trencavelli, Andreas Verdu, Guillermus Çalvati, Guillermus de Na Grisa, Arnaldus de Ça-Taillada.

Sig+num Berenguer Scriba, qui mandato Guillermi Raymundi de Viella hanc cartam scripsit, loco, die et anno prefixis.