Hoc est translatum de verbo ad verbum bene et fideliter sumptum, videlicet pridie nonas julii anno Domini millesimo CCCº Xº VIII, cum auctoritate tamen et decreto venerabilis Johannis de Bruscha, justicie Morelle, a quodam privilegio regio in pergameno scripto, sigillo cereo apendicio sigillato, non raso nec cancellato, nec in aliqua sua parte abolito seu viciato, tenor cuius sequitur in hunc modum:

Noverint universi, quod nos, Jacobus, Dei gratia rex Aragonum, Maioricarum et Valentie, comes Barchinone et Urgelli et dominus Montispesulani; per nos et nostros damus et concedimus per hereditatem propriam, francham et liberam, vobis Bernardo de Maderes, Bernardo Aguiló, Raymundo et Berengario d'Agiló, Arnaldo Barberà, Guillermo Escuder, Ferrario de Bruscha, Bernardo de Quadres et Berengario Bertrandi, et vestris et cui volueritis imperpetuum, totam villam de Burriol.

Quam villam habeatis cum pratis, pascuis, herbis, lignis, silvis, venationibus, aquis, molendinis, furnis factis et faciendis, et omnibus terminis et montibus et planis, et quibuslibet aliis terminis, heremis et populatis, introitibus, exitibus, affrontationibus, et suis pertinentiis universis a celo in abissum, ad omnes voluntates vestras et vestrorum, cuicumque volueritis faciendas, exceptis militibus, clericis, et viris religiosis.

Retinemus tamen ibi hostes et cavalcatas, et causas criminales et civilis.

Et quod faciatis secundum quod fecerint alii habitatores Valentie.

Et quod hinc ad decem annos aliqua predictorum non vendatis.

Concedimus etiam vobis, quod predictam villam cum suis terminis possitis inter vos dividere, et ibi alios populatores, quot et quos volueritis, populare.

Et retinere vobis et dare illis quos ibi populaveritis, secundum voluntatem et arbitrium vestrum. Et divisionem quam inde feceritis, laudamus, concedimus et confirmamus.

Datum Morelle, pridie idus februarii anno Nativitatis Domini millessimo CCº quinquagesimo.

Sig+num Jacobi, Dei gratia regis Aragonum, Maioricarum et Valentie, comitis Barchinone et Urgelli et domini Monispesulani.

Testes sunt: Petrus Cornelli, maiordompnus Aragonum, Petrus de Montecatheno, Raymundus de Montecatheno, Guillermus de Angularia, Eximinus Petri.

Sig+num A. de Ulmo, qui mandato domini regis, pro Gonçalbo Petri, eius notario, hec scribsit loco die et anno prefixis.

Sig+num Johannis de Bruscha, justicie Morelle predicti, qui huic translato actoritatem suam prestitit et decretum.

Presentibus testibus Raymundo Castell, notario de Xiva, et Dominico Sent Martí.

Sig+num Mathei d'Albarels, publici notarii Morelle, qui viso originali huic transllato, me pro teste subscribo.

Sig+num Dominici Ros, notarii Morelle publici, qui viso originali huic translato, pro teste me subscribo.

Sig+num Bartholomei d'Almenar, actoritate domini regis Aragonum publici notarii per totam terram et dominacionem eiusdem, qui predictum translatum scribsit et de mandato dicti justicie eius iussu actoritatem suam aposuit, et clausit die et anno in prima linea contentis.