In Dei nomine.

Noverint universi quod nos, Poncio, Dei gratia dertusensis episcopus, et Guillermus, prior, assensu et voluntate capituli ecclesie dertusensis, per nos et omnes successores nostros, cum hoc presenti publico instrumento perpetuo valituro, damus et concedimus in hereditate propria, franca et libera, vobis, Bernardo de Maderes, Bernardo Aguiló, Raymundo et Berengario Aguilar, Arnaldo Barber, Guillermo Scuder, Ferrario de Bruscha, Bernardo de Quadres, Berengario Bertrandi, Bernardo Armiguer et Ferrario de Tenes, et vestris et cui volueritis imperpetuum, totam villam de Burriol.

Quam villam damus cum pratis, pascuis, herbis, lignis, silvis, venationibus, aquis, molendinis, furnis factis et faciendis, et omnibus terminis et montibus et planis, et quibuslibet aliis terminis, heremis et populatis, introitibus et exitibus, affrontationibus, et suis pertinentiis universis a celo in abissum, ad omnes voluntates vestras et vestrorum, cuicumque volueritis faciendas, exceptis militibus, clericis, et viris religiosis.

Retinemus tamen ibi hostes et cavalcatas, et causas criminales et civilis.

Et quod faciatis secundum quod fecerint alii habitatores Valentie.

Et quod hinc ad decem annos aliqua predictorum non vendatis.

Concedimus etiam vobis, quod predictam villam cum suis terminis possitis inter vos dividere, et ibi alios populatores, quot et quos volueritis, populare.

Et retinere vobis et dare illis quos ibi populaveritis, secundum voluntatem et arbitrium vestrum. Et divisionem quam inde feceritis, laudamus, concedimus et confirmamus.

Predictam autem donationem sub hac conditione vobis facimus, quod vos et successores vestri faciatis nobis et successoribus nostris homagium et fidelitatem [ore et manibus] quandocumque a nobis fueritis requisiti. Verum cum dominus rex villam de Burriol a nobis recuperaverit cum nostra voluntate et assensu, a predicto homagio et fidelitate sitis a nobis liberi [penitus] et absoluti.

Quod est actum, septimo decimo kalendas octobris anno Domini millesimo ducentesimo quinquagesimo.

Ego, Poncius, dertusensis episcopus, subscribo +.

Sig+num Guillermus, prioris. Sig+num Arnaldi, sacriste. Sig+num B., precentoris dertusensis. Sig+num R. de Taliata, dertusensis canonici. Sig+num Petri de Podio, dertusensis camerarii. Sig+num Dominici, dertusensis hospitalarii. Sig+num G. de Tamarito, dertusensis canonici.

Sig+num Petri de Tamarito, notarii dertusensis publici, qui hoc scripsit cum litteris rasis et emendatis, in prima linea, ubi dicitur "et Guillermus, prior", die et anno prenotatis.