Noverint universi, quod nos Jacobus Dei gratia rex Aragonum, Maioricarum et Valencie, comes Barchinone et Urgelli et dominis Montispesulani; cum secundum consuetudines a nobis datas civitati et regno Valencie, et civitate et omnibus villis, castris, et quibuslibet aliis locis eiusdem regni, unum et similis pondus esse debeat et mensura; statuimus per nos et per nostros imperpetuum decernimus:

Quod marcha habeat et contineat in se octo uncias. Et uncia contineat in se viginti quatuor denarios, de denariis qui sint XVI solidorum de marcha.

Arrova et quarterium vini contineat XXXª libras.

Quintallus sit ad IIIIor. arrovis.

De arrova XXX libras, libra carnicerie habeat III libras, unamquamque librarum XII unciarum.

Kafficium habeat sex fanecas rasas. Fanecha habeat VIIIº almutas rasas, et in medio et moris faneche sit virga ferrea et almuti oris; et os faneche et almuti sit ex omnibus partibus equales et similie.

Annona, itaque, quod triticum, avena, ordeum, pacinium multum, et omnia alia sementa que debent mensurari, mensurentur; de ferro ad ferrum, sal, castane, avellane, furfur, calç et consimilia, mensurentur cum fenecha currenti.

Alnee sint IIIIor. palmorum, et eorum capita sint ferrea. Et omnes panni, lenci et lane, et quilibet alii, recipiantur et dentur cum tali alnea, et ultra alneam dentur duo digiti.

Saumata sive carga vini sit XV quarteriorum, et si duxerit portadores sit XIII quarteriorum.

Si igitur omne avere de levante et ponente, et aliunde, et victualia, lana, vinum, vindemia, oleum, casca, seda, linum, stuppa, canabum, ficcus, panses, farina, et omne aliud avere grossum et minutum, quod ponderari debeat, ponderetur, liberetur, tradatur, recipiatur, ad pondus predictus.

Et nunquam predicta marcha, uncia, libra, arrova, quarterium, quintallus, libra carniceria, cafficium, fanecha, almutus, saumata, sive carga vini et alne mutentur, minvantur vel augeantur, sed predicta semper sint, sicut superius continetur, in civitate et toto regno Valencie, salvo iure nostro.

Datum Calataiubo, XVI kalendas decembris anno Domini Mº CCº XLº nono.

Sig+num Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt Jacobus de Cervera, Guillermus de Granyana, Guillermus de Entença, Eximinus de Focibus et Eximinus Petri.

Sig+num Petri Andree, qui mandato domini regis hec scribi fecit pro Guillermo de Bello Lucho, notario suo, loco, die, et anno prefixis.