Noverint universi, quod nos Jacobus Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros successores, concedimus et statuimus, imperpetuum, quod in Albuffaria Valencie possit quilibet vicinus et habitator civitatis et regni Valencie, et quilibet etiam extraneus, piscare et pisces capere; et non teneatur nobis aut nostris unquam dare de ipsis piscibus, nisi tantum quintam partem francham, sine omni missione nostra et nostrorum. Residue IIIIor partes sint piscatorum; nec etiam de eisdem IIIIor partibus aliqua decima vel primicia unquam donetur.

De piscibus autem qui in quocumque loco maris regni Valencie capiuntur, detur nobis et nostris decima pars; relique vero novem partes sint capiencium, et de eis non donetur unquam aliqua decima vel primicia.

Pisces autem qui mari et Albuffera et stagnis, cequiis, et aliis aquis salatis et dulcibus capiuntur, vendi sine obstaculo et interdicto nostro et nostrorum, et alterius cuiuslibet possint in civitate Valencie, et duci et vendi extra civitatem et per totum regnum Valencie, et alibi ubicumque extra regnum Valencie, in tota dominacione et iurisdiccione et vestra cuiuslibet alterius.

Et nos et nostri vel quilibet alii non inhibeamus nec interdicamus aliqua causa, modo, iure, vel occasione, quod pisces quos de quinta Albuffere aut de iure nobis pertinenti in mari, sicut supra dicitur, habemus vel habebimus, vendantur primitus quam pisces quos piscatores receperint vel habuerint; immo pisces piscator vendantur simul et eodem loco et hora et tempore, et quecumque visa fuerit piscatoribus et emptoribus piscicum.

Aves autem que capiuntur in Albuffera et in mari et cequiis, et quibuslibet aliis aquis et rivis, et celo et terra capiencium sint imperpetuum, et de eis aut racione ipsarum nobis et nostris aliquid non detur, nec etiam detur de eis aliqua decima vel primicia.

Sal civitatis Valencie vendatur in civitate Valencie et per totum terminum, sive Murvedre, Sugurbio, Altura, Castronus, Xerchia, Eslida et tota sua montanea, et Ondam, Burriana, et Castellione Burriane, et usque ad gradum de Orpesa, et in Cullam, Algezira, Xelva, Liria, Bunsol, Macasta, Turris, Madrona, et omnibus castris, villis, et locis citra Xucharum et citra predicta loca.

Pro fanecha itaque currenti salis, que in civitate Valencie et eius termino vendatur, non accipiatur nec detur a civibus sive habitatoribus predictorum locorum, nec etiam ab aliquibus aliis privatis vel extraneis undecumque sint, qui in civitate Valencie et eius termino emerint salem, nisi tantum XII denarii usualii moventis et non amplius.

Emptores vero salis qui a nobis vel baiulo nostro ipsum emerint, teneantur salem qui de suo anno superaverit, date novis emptoribus pro tribus denarii fanecham in loco ubi sit sal, et pro IIIIor denariis fenecham in concham Albuffarie, et pro V denariis fanecha in civitate Valencie. Et veteres emptores totum salem tradere teneantur novis emptoribus precio antedicto, nisi pro minori precio dare illum voluerint, et nichil de sale retineant, exceptis X kafficiis salis, ad usum sive ad expensam domus sue, sed ipsos X kaficis non vendant vel alicuius distrahant alicui.

Si vero novi emptores salem qui remanserit veteribus emptoribus de suo anno emere noluerint, vel non oportuerit ipsos illum emere, cum forte sufficientiam salis habeant, ipsi veteres emptores non vendant vel aliter distrahant sive alienent ipsum salem alicui.

Novi vero emptores non possint salem facere infra tempus vel annum quo venditus vel traditus fuerit alii, cum totus sal illius anni sive temporis pertineat ad priorem emptorem.

Verum si salem nos vel nostri successores non vendiderimus, et salem illum facere voluerimus, quantumcumque demus vel expendamus pro faciendo et ducendo illum, non possimus exigere vel accipere nisi solum modo XII denariis pro fanecha currenti salis.

Et nos et nostri, et emptores sive quocumque modo salis detentores, ducamus et faciamus duci, et ponamus, mittamus et teneamus infra civitatem Valencie sufficienciam salis, ad vendendum, et non accipiantur vel dentur unquam pro currenti fenecha salis, que in civitate Valencie et eius termino vendetur, nisi solummodo XII denarii usualis monete.

Omnia insuper et singula suprascripta, per nos et omnes successores nostros concedimus et laudamus, et approbamus et statuimus in perpetuum valitura.

Datum Morelle, XIIº kalendas febroarii anno Domini Mº CC. Lº.

Sig+num Jacobi, Dei gratia regis Aragonum, Maioricarum et Valencie, comitis Barchinone et Urgelli, et domini Montispesulani.

Testes sunt: Petrus Cornelii, Carrocius, Alaman, Guillermus de Montecatheno, Guillermus de Angularia, Raimundus de Timor.

Sig+num Guillermi de Rocha, qui mandato domini regis, pro Guillermo Scribe, notario suo, hec scribi fecit loco et die et anno prefixis.