Noverint universi quod nos Jacobus Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; attendentes quod civitas Cesaraugusta etiam paganorum tempore multis privilegiis et dotibus extitit insignita, quare christianorum tempore et nostro maxime ipsam civitatem honoris et dignitatis privilegiis dignam credimus insigniri; per nos et nostros concedimus vobis universis civibus dicte civitatis, quod habeatis et faciatis nundinas singulis annis, per quindecim dies, scilicet, per octo dies ante festum sancti Johannis Babtiste, et per alios octo dies continuos post dictum festum.

Volumus igitur et statuimus quod omnes illi qui ad dictas nundinas venerint, undecumque sint, per totam terram et dominationem nostram sint salvi et securi cum omnibus mercibus et rebus eorum veniendo, stando et redeundo; et omnes res et merces que vendentur et ementur in dictis nundinis sint salve emptoribus et venditoribus secundum bonam consuetudinem nundinarum.

Quare mandamus quod nullus de gratia nostra confidens eos audeat detinere, impedire, molestare, gravare, marchare, vel pignorare, dum parati sint de se conquerentibus facere justitie complementum, nisi tamen fuerint debitores principales vel fideiussores pro aliis constituti.

Quicumque autem contra predictum presens instrumentum venire temptaverit iram et indignationem nostram se noverit incursurum, et nichilominus dampno illato primitus restituto, penam mille morabatinorum se noverit incursurum.

Datum Valencie, nonas marcii, anno Domini M CC XL nono.

Signum + Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: G. de Montecatheno, G. de Entença, G. de Angularia, G. de Aquilone, G. de Crexello.

Sig+num A. de Ulmo, qui mandato domini regis, pro G. Scribe, notario suo, hec scribi fecit loco die et anno prefixis.