Noverint universi, quod nos Jacobus Dei gratia rex Aragonum, Maioricarum et Valencie, comes Barchinone et Urgelli et dominus Montispessulani, per nos et omnes nostros enfranchimus vos, universos homines et singulos populatores sive habitatores in villa et podio de Bellver, et successores vestros presentes et futuros, in perpetuum, cum omnibus bonis vestris habitis et habendis, ab omni servitio, censu et usaticho, excepta hoste et cavalcata et eorum redemptione, et iustitiis.

Concedentes vobis et vestris in perpetuum, ut ligna, montaneas et aquas, atque pascua, habeatis francha et libera ibi et infra iuredictionem nostram.

Et aliquis qui habitator non sit vobiscum in dicta villa sive podio, non vendat aliquid ad tallium nec teneat tabulam.

Et annuatim singulis septimanis habeatis et teneatis ibi in die martis mercatum.

Et similiter habeatis ibidem annuatim in festo Pentecosten nundinas sive feriam per dies XVcim duraturam.

Verum si aliquis alicui vestrum, iniuste malum fecerit, possitis malefactorem illum compellere sine assensu baiuli nostri, donec malefficia et dampna vobis illata sint plenarie restituta.

Et possitis debitores vestros extra villam comorantes compellere ad solvenda debita vobis, facta tamen primitus fatica ter in nostrum locumtenentem.

Et quilibet vestrum credatur usque ad sumam C solidos si suum valebit mille solidos.

Retinemus autem nobis et nostris in perpetuum bovaticum, monetaticum, furnos, lenas, molendina facta et facienda.

Volumus siquidem quod placitetis de X diebus in X, sicut est consuetudo Barchinone.

Et caminum a sede Urgellensi usque ad Podium Ceritanie transeat per predictam villam.

Promittentes quod dictum podium sive villam aut aliquem ibi habitantem non donemus alicui, nec vos et omnia bona vestra habita et habenda ubique per dominationem nostram, eundo, stando et redeundo, salve et secure, sub nostra custodia, guidatico et comenda, et specialiter homines et feminas undecumque fuerint, ad dictum mercatum et feriam venientes et inde redeuntes.

Mandamus igitur vicariis, baiulis, et nostris subditis, quatenus contra aliqua predictorum non veniant nec aliquem venire permittant.

Datum Perpiniano VIIIº idus ianuarii, anno a Nativitate Domini M. CC. XL. secundo.

Signum + Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispessulani.

Testes sunt: Petrus de Montecateno, Bernardus Hugus de Serra Longa, Galcerandus de Pinos, Lupus Eximenei de Lusia, Arnaldus Surdus.

Sig+num Guillemoni, scribe, qui de mandato domini regis hec scripsit, loco, die et anno prefixis.

Lecta fuit regi.