Pateat universis quod nos Jacobus, Dei gratia rex Aragonie, Maioricarum et Valentie, comes Barchinone et Urgelli et dominus Montispesulani; concedimus vobis universis et singulis hominibus de Livia quod possitis meliorare ac construere et operari domos ad pedem podii de Livia, in parrochia sancte Marie, et ibi stare et habitare.

Ita tamen quod domos quas habetis sursum, in fortitudine ipsius podii, non diruatis nec permitatis dirui vel distrui, sed ipsas teneatis conductas, ut guerre vel necesitatis tempore vos cum rebus vestris in eis salvare, vos et deffendere valeatis.

Mandantes vicariis, baiulis, et universis aliis officialibus et subditis nostris, presentibus et futuris, quod contra hanc concessionem nostram non veniant, nec aliquando venire permittant aliqua ratione, immo eam observent et faciant ab omnibus firmiter observari.

Datum Ilerde, quarto idus madii anno Domini Mº CCº quinquagesimo septimo.