Noverint universi quod nos Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; ad honorem domini nostri Jhesucristi, qui dedit semetipsum pro nobis ut nos redimeret, et ad utilitatem terre nostre et hominum nostrorum, presentium et futurorum, facimus, edificamus et construimus villam et fortitudinem cum muro et vallo, ac omnibus aliis necessariis suis in termino castri Villemaioris, in loco qui dicitur Cardedol.

Et ad opus operis predictorum muri et valli, damus et assignamus omnes reditus et exitus nostros ville predicte de Cardedol, et Franquedarum de Vallesio, et de Maresmo, de speciali gratia hinc ad IIIIor annos primos venturos et continue completos.

Qui reditus et exitus volumus quod congreguentur et recipiantur de cetero per omnes predictos IIIIor annos, per manum Bernardi de Montills et Petri de Ledono, et ponantur in opere antedicto, quoniam nos ipsos facimus et constituimus procuratores operis antedicti.

Dantes et concedentes eisdem licentiam et plenum posse faciendi dictum murum et vallum in circuitu ipsius ville, et transeundi ipsum murum et ipsum vallum per quecumque loca ipsi voluerint, et prout eis ad utilitatem ipsius ville visum fuerit faciendum.

Et insuper volumus quod caminus publicus qui vadit de Barchinona ad Sanctum Celedonium, transeat de cetero per villam predictam de Cardedol, et quod predicti Bernardus de Montills et Petrus de Ledono, cindant et cindere possint seu trancare caminum seu viam antiquam per quam modo itur de Barchinona ad Sanctum Celedonium, in illis videlicet locis ubi eis visum fuerit, faciendum ob hoc ut omnes transeuntes seu euntes et redeuntes de Barchinona ad Sanctum Celedonium, transeant et transire eos oporteat per villam predictam de Cardedol.

Prohibentes firmiter et statuentes quod de cetero nullus sit ausus transire per predictum caminum vetus, sed per predictam villam de Cardedol, ut superius est dictum, cum aliquibus bestiis oneratis vel aliter modo aliquo vel ratione; quod qui fecerit penam inferius positam solvat nobis quotienscumque transgressor fuerit huius nostre prohibitionis seu mandati, videlicet ille qui transierit equitando extra dictam villam, solvat II solidos pro pena, et ille qui transierit pedes extra villam dictam, solvat XII denarios pro pena, et ille qui transierit extra dictam villam cum bestia onerata, solvat V solidos; quam penam volumus quod colligat et percipiat pro nobis et loco nostri baiulus eiusdem ville.

Item, ad utilitatem ipsius ville et habitatorum eiusdem, damus, concedimus hominibus ipsius ville et termini sui imperpetuum firam et mercatum, qui mercatus fiat et celebretur in dicta villa, de cetero, omnibus diebus mercurii uniuscuiusque septimane; et dicta fira fiat et celebretur quolibet anno, in festo sancti Crucis mensis septembris, et duret III dies.

Et omnes qui venerint cum mercibus vel aliis rebus suis ad dictum mercatum et ad dictam firam, sint franchi ab omni lezda in dicta villa hinc ad IIIIor annos, mensuratim excepto.

Nos enim, recipimus sub nostra protectione, comanda et guidatico speciali, omnes mercatores et alios qui venerint ad dictam firam et ad dictum mercatum cum omnibus mercibus et rebus suis, in veniendo, stando et redeundo, ita quod nullus confidens de nostra gratia sit ausus ipsos vel aliquem ipsorum seu merces vel res eorum in aliquo loco capere, invadere, detinere, marchare, vel pignorare, seu aliter impedire culpa et crimine vel debito alieno, nisi principales debitores fuerint vel pro aliis fideiussores constituti, nec etiam in hiis casibus nisi prius in ipsis fatiga inventa fuerit de directo.

Excipimus tamen de isto guidatico homicidas et proditores, robatores et banditos nostros.

Item, infranquimus et franchos facimus de speciali gratia hinc ad IIIIor annos primos venturos et continue completos, omnes et singulos habitatores ville predicte de Cardedol et termini ac pertinentiarum eiusdem, ab omni peita, questia, cena et qualibet alia exactione regali, ita quod infra predictos IIIIor annos non donent nobis nec nostris, nec dare seu solvere teneantur rationibus supradictis, immo a predictis omnibus et singulis sint quitii, libere et penitus absoluti per omnes predictos IIIIor annos, sicut melius et utilius dici vel intelligi potest ad eorum bonum et sicurum ac utile intellectum.

Mandantes et cetera.

Data Gerunde, III idus madii, anno Domini M. CC septuagessimo IIº.