Noverint universi quod nos Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros damus et concedimus universis et singulis hominibus venientibus ad populandum ad populatione Ville Nove in termino de Cubellis, iuxta Guialtrudem, vel ad aliam populationem qui sit iuxta mare in termino de Cubelles, in loco vocato Ça Lacuna, vel ibi iam habitant quod pro domibus quas ibidem facient nec pro bonis mobilibus que ibidem modo aportabunt, non teneantur aliquo tempore facere nobis exercitum neque nostris, nec cavalcatam, nec dare peytam sive questiam, nec cenam, nec aliquam aliam regalem exactionem, set sint inde quitii et penitus perpetuo absoluti, prout melius dici potest et intelligi ad eorum bonum et sincerum intellectum.

Pro honoribus autem quos ibidem habebunt, exceptis domibus, et pro honoribus etiam quos alibi emerint de realencho vel aliter habebunt nobis et nostris perpetuo servire teneantur.

Preterea infranquimus eosdem et omnia bona eorum per decem annos primos venturos ab omni lezda et pedagio.

Item, scilicet, quod infra dictos decem annos non teneantur nobis nec nostris dare de aliquibus rebus vel mercibus suis in aliquo loco terre nostre, pedagium aliquod neque lezdam, set sint inde franchi, quitii et penitus absoluti.

Recipimus etiam ipsos et omnia bona eorum in nostra protectione, custodia, comenda et guidatico speciali, in eundo, stando et redeundo per omnia loca totius dominationis et iurisdictionis nostre. Ita quod nullus sit ausus de nostri gratia confidens ipsos bona nec bona eorum in aliquo loco terre vel dominationis nostre invadere, capere, detinere, marcare, offendere vel gravare, aut etiam pignorare culpa, crimine, vel debito alieno, nisi principales fuerint debitores vel fideiussores pro aliis constituti, nec etiam in hiis casibus nisi prius in ipsis fatica inventa fuerint de directo.

Mandantes vicariis, baiulis, curiis et aliis officialibus et subditis nostris presentibus et futuris, quod dictum guidaticum nostrum firmum habeant et observent, et faciant observari et non contraveniant nec aliquem contravenire permitant aliqua ratione, immo dictos homines et bona eorum, unicumque manuteneant et deffendant, ipsis tamen facientibus conquerentibus de se iustitie complementum.

Quicumque autem, contra hec guidaticum nostrum venire atemptaverit, iram et indignationem nostram et penam centum morabatinorum se noverit incursurum, dampno illato primitus integre et plenarie restituto.

Data Barchinone, sexto kalendas augusti, anno Domini Mº CCº LXXº quarto.

Sig+num Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: Geraldus vicecomes Caprarie, Guilabertus de [.....], Gaucerandus de Pinos junior, Bernardus de Scintelle, Petrus de Vilamur.

Sig+num Bartholomei de Pena, qui mandato domini regis hec scribi fecit, cum litteris suprapositis in secunda linea, ubi dicitur "vel", et clausit loco die et anno prefixis.