Noverint universi, quod nos Jacobus, Dei gratia rex Aragonum, Valentie et cetera; per nos et nostros concedimus vobis, consilio Morelle et universis hominibus aldearum et locorum omnium terminorum eiusdem, tam nostris scilicet quam ordinumque militum quorumlibet imperpetuum, quod possitis facere ligallum in termino Morelle.

Quodquidem ligallum celebretur bis in unoquoque anno de cetero, videlicet una vice in tercia die post unumquodque festum Pentecostes, et alia vice in unoquoque festo sancti Michaelis septembris.

Ad quod ligallum ubicumque in terminis Morelle celebrabitur, teneantur venire vel mitere pastores suos, omnes illi qui habuerint vel tenuerint ganatos suos ad pascendum in terminis antedictis, et abducere ibi ganatum "mostrench" sive amissum quod habuerit.

Et ille qui diebus predictis celebracionis dicti ligalli ad ipsum ligallum non venerit vel suos pastores non miserit, ut est dictum, teneatur persolvere et dare nobis vel baiulo nostro Morelle loco nostri decem solidos pro pena.

Statuentes etiam quod illud ganatum "mostrench" sive amissum, quod in dito ligallo invenietur, reddatur domino cuius fuerit libere et sine impedimento.

Et si aliquis vel aliquem predictum "mostrenc" quod tenuerit ad dictum ligallum non adduxerint, ut est dictum, et de hoc postea convicti fuerint vel postmodum inter ganatos suos inventum fuerit, illud ganatum "mostrench" in duplo reddant cuius fuerit, et teneantur solvere nobis vel dicto baiulo nostro loco nostri sexaginta solidos pro pena.

Et si forte aliquod ganatum "mostrench" sive amissum ad celebrationem dicti ligalli adductum fuerit, et dominus ei non fuerit inventus, cuius sit, teneatur manifeste usque ad primam tunc sequentem celebrationem ipsius ligalli; et si in ipsa sequenti celebratione ipsius ligalli dominus nondum eidem ganato invenietur, illud tale ganatum sit nostrum et accipiat ipsum baiulus noster Morelle vel locum eius tenens loco nostri.

Insuper, etiam statuimus et volumus ac concedimus vobis, quod baiulus noster Morelle, cum consilio consilii Morelle, eligat aliquam personam ydoneam singulis annis, qui predicta omnia pro ipso distringat et colligat ac faciat observari, ut superius continetur, eaque iuret quod bene et fideliter se in predictis habeant atque gerat.

Datum Valencie XVII kalendas aprilis anno Domini Mº CCº LXXº.

Sig+num Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.