Noverint universi, quod cum questio verteretur inter abbatem et conventum monasterii Benifaçani, ex una parte, et justiciam ac consilium Morelle, ex altera, super justiciis quas idem abbas et conventus vel eorum baiuli exercebant in aliquibus villis et locis suis terminum Morelle, quas exercere dicebantur in nostre juredictionis prejuditium et gravamen, et super erbagio quod recipiebant in terminis ipsarum villarum suarum atque locorum termini Morelle, de bestiariis pascentibus in eisdem, quod similiter in nostrum prejuditium recipere dicebantur; et dicta questio ad nos Jacobum, Dei gratia regem Aragonum, Valencie, et cetera, seu ad nostram audientiam pervenisse; nos Jacobus, Dei gratia rex predictus, dicimus et determinamus inter partes predictas, quod predictus abbas et conventus non possint nec debent exercere justicias criminales in aliquibus villis vel locis suis, quas seu que habent in termino Morelle, sed ipse justicie criminalis ad nos vel ad justiciam nostrum Morelle, loco nostri pertinent facienda.

Dicimus etiam et determinamus inter easdem partes, quod iidem abbas et conventus in ipsis villis et locis non debent recipere erbagium, sed nos tamen pro eo, sed quia ipse ville et loca sunt in termino Morelle, et sic ipsum erbagium, racione castri Morelle, quod nostrum est, et racione cuius debet accipi erbagium in terminis suis, spectat et debet ad nos et non ad dictum monasterium penitus spectare.

Mandantes firmiter baiulo et justicie Morelle, presentibus et futuris, quod predicta ut superius a nobis sunt determinata observent de cetero, et faciant observari, et non contraveniant nec aliquem contravenire permittant aliqua racione.

Datum Valencie, VIIIº kalendas aprilis anno Domini Mº. CCº. LXXº VIº.