Noverint universi, quod nos Jacobus Dei gratia rex Aragonum, Maioricarum et Valentie, coms Barcinone et Urgelli ac dominus Montispesullani; per nos et nostros damus et concedimus vobis, universis et singulis hominibus de Benavarre, presentibus scilicet et futuris, imperpetuum, quod de cetero habeatis pascherium in terminis villarum et locorum contiguum ville et almuniis seu terminis nostris de Benavarre, secundum forum Aragone, de area ad aream.

Et possitis lignare seu scindere ligna in terminis villarum et locorum predictorum, ad opus vestrarum domorum et furnorum vestrorum, non tamen ad vendendum prout hactenus antecessores vestri facere consuverunt.

Item, concedimus vobis quod hominis de Aler teneantur peytare vobiscum insimul in omnibus exactionibus realibus et vicinalibus, pro honoribus et possessionibus de realencho quas habent in termino de Benavarre, vel de cetero habebunt.

Item, concedimus vobis quod omnes illi homines qui aliquid tenent modo de realencho nostro in Benavarre vel eius termini, seu tenebunt de cetero qui se transtulerunt seu transtulerint ad dominationem ecclesiasticam seu ad donationem infançonis, teneantur ponere et solvere vobiscum insimul in omnibus exactionibus regalibus et vicinalibus pro realenco predicto, vel de emparare vobis dictum realencum. Et quod ad hoc faciendum et complendum, baiulus de Benavarre possit compellere et pignorare bona ipsorum ubicumque ea inveniri poterint extra dominacionem ecclesie vel infançonis.

Item, concedimus vobis quod omnes illi homines de Benavarre et terminos et pertinentiarum suarum, qui se dicunt esse infançones, teneantur pactare vobiscum insimul in predictis donec in posse nostro suam probaverunt infançoniam, secundum forum Aragone.

Item, concedimus vobis quod collector questiarum nostrarum et aliarum exactionum nostrarum de Benavarre possit compellere cum auxilio hominum terre seu iuncte de Rippacurça, omnes illos homines de Benavarre et terminorum suorum, qui aliquid solvere tenebuntur vobiscum insimul in predictis, ad solvendum partes suas pro eo quod de realencho habuerint et tenuerint in villa et termino de Benavarre, secundum quod talliatum fuerit eisdem.

Item, concedimus quod castlani de Benavarre qui debent custodire castrum de Benavarre de nocte tempore guerre, compellantur per vicarium Rippacurcie ad custodiendum de nocte dictum castrum, ut facere tenentur.

Mandantes firmiter baiulis, curiis, justiciis et universis aliis officialibus et subditis nostris, presentibus et futuris, quod predicta firma habeant et observent et non contraveniant nec aliquem contravenire permittant aliqua racione.

Datum Ilerde octavo kalendas aprilis anno Domini millesimo ducentesimo septuagesimo quinto.