Noverint universi quod nos Jacobus, Dei gratia rex Aragonum, Maioricarum et Valencie, et comes Barchinone et Urgelli et dominus Montispesulani; intelleximus quod siquis in fratrem ordinis Templi receptus alicui persone vel personis indebitis et iniuriis aliquibus, vel quibuslibet aliis fuerit obligatus pro eo Templum et pignorantur et cotidie gravantur, et pro inde ordini Templi et fratribus eiusdem proveniunt plura dampna, propter quod fratres Templi ad sui ordinis professionis quam plures recusant, admittere ne propter debita et iniurias volencium a dictorum comuni vestri ordine predictos fratres vexari contingat, et sic hii qui comuni desidant prohibentur indirecte sive laudabile propositum adimplere, et certa sancta plurium personarum defraudatur servicio qui sanguinem proprium ibidem vellent effundere inimicis Crucis Christi, quantum eis foret possibile propellendo; idcirco nos, Jacobus, Dei gratia rex Aragonum predictus, apud Ylerdam in generali curia personaliter constitutus; attendentes et considerantes devocionem ac necessitatem dicti ordinis cuius fratres ad deffensionem terre sancte, ad honorem Dei et ampliacionem fidei christiane se cotidie mortis periculo exponere non formidant, et quod propter predicta dictus ordo molestias et dampna plurima sustinuit et sustentat, quibus nisi per reges et principes per quos tueri debent remedium adhiberetur non possent ipsi templarii ad servicium sufficere Ihesu Christi; habito super hoc diligenti tractatu cum nobilibus viris baronibus et richis hominibus et civibus Cathalonie et Aragonie in prefata curia congregatis, per nos et omnes successores nostros, ad honorem Dei et gloriose virginis Marie matris eius, piis supplicacionibus venerabilis fratris Arthaldi de Castro Novo, magistri milicie Templi in Aragonia et Cathalonia, aliorumque fratrum dicti ordinis inclinati ex plenitudine nostre regis potestatis, damus, indulgemus et concedimus dicto ordini Templi et universsis fratribus eiusdem in regnis terris et iurisdiccione nostra constitutis, presentibus et futuris, ac perpetuo statuimus et ordinamus, quod pro aliquo vel aliquibus fratribus qui in prefato ordine recepti sint vel de cetero recipiantur, et Templum vel homines aut bona sua non pignorentur vel impediantur, nec modo aliquo in iuditio vel extra graventur ab aliqua vel ab aliquibus personis, racione debiti iniurie vel alterius cuiuslibet rey vel cause in quibus teneantur principaliter vel pro aliis obligati, et volumus et statuimus quod si frater vel fratres qui recepti fuerint heredem seu heredes sibi restituerint creditores et querelantes fratris seu fratris receptorum transeant per ipsos heredes priusquam fratres Templi po[...] conventi super bonis Templo collatis per fratrem seu fratres receptos. Si vero heredes non relinquant sed alia bona sua dederint vel legaverint vel alio modo alienaverint, ipso ingressu vel ante, volumus et statuimus quod fratres Templi respondeant creditoribus et querelantibus ipsius fratris seu fratrum receptorum, pro rata tantu bonorum que Templo per fratrem seu frares receptos data fuerint seu collata.

Item, volumus et statuimus quod si aliquis vel aliqui qui habitum Templi non receperint, castra, possessiones vel bona aliqua declineret vel dimiserint Templo et reliquerint seu instituerint sibi heredem seu heredes creditoris, et querelantes ipsius vel ipsorum relinquancium transeant primitus per ipsum heredem seu heredes priusquam fratres Templi conveniatur super castris, possessionibus et bonis Templo relictis seu collatis.

Et si forte heredem vel heredes non relinquerint nec instituerint et alias bona sua dederint vel legaverint vel alio modo alienaverint, volumus et statuimus in hoc casu quod frares Templi respondeant creditoribus et querelantibus ipsorum relinquantium pro rata circa bonorum que Templo data ab ipso vel ab ipsis fuerint seu collata.

Exceptis tamen in omni casu equis et armis corporum ipsorum ingrediencium vel relinquantium de quibus fratres Templi non teneantur alicui creditori seu querelanti de eisdem in aliquo respondere, vel ea restituere cum sint in Terre Sancte subsidium specialiter deputata.

Mandantes firmiter procuratoribus, vicariis, baiulis, curiis, paciariis, justiciis, juratis, zalmedinis, merinis, suprajunctariis, alcaydis, et universis aliis officialibus et subditis nostris, presentibus et futuris, quod predicta omnia et singula firma habeant et observent et faciant ab omnibus observari inviolabiliter, ut superius continetur, et non contraveniant nec aliquem contravenire permittant aliqua racione.

Datum Ilerde idus aprilis anno Domini Mº CCº LXXII.

Signum + Jacobi, Dei gratia regis Aragonum, Maioricarum et Valencie, et comitis Barchinone et Urgelli et dominus Montispesulani.

Huius rey testes sunt G. Ylerdensis episcopus, R. vicensis episcopus, R. vicecomes Cardone, R. vicecomes de Castro Novo, et R. de Montechatano, P. de Berga, B. G. d.Entenza, Blasius de Alagone.

Sig+num Simonis de Sancto Felicio, qui mandato domini regis predicti hec scribi fecit et clausit loco die et anno prefixis.