Pateat universis presentem paginam inspecturis quod nos Antiqus Titionis, vicarius Barchinone et Vallesii, attestamur et veritatis testimonium perhibemus, quod nos vidimus et tenuimus quoddam instrumentum in pergameno scriptum et sigillatum sigillo maiori cereo pendenti illustrissimi domini Jacobi felicis recordationis regis Aragonum, Maioricarum et Valencie, comitisque Barchinone et Urgelli et domini Montispesulani; quod quidem instrumentum supradictum fuerat malefactum et propter eius malefactionem et tinearum corrosionem in aliquibus partibus legi non poterat.

Verumtamen per ea que de ipso instrumento legi poterant, liquide apparebat quod dictus dominus rex vocabat homines Vallis de Aran homines suos, et fecit dictum instrumentum dictis hominibus suis Vallis de Aran, et quod in ipso instrumento eis et suis imperpetuum, inter alia, concessit quod ipsi homines dicte Vallis de Arran possent uti in ipsa Valle moneta jaccensis, et in quo etiam privilegio eisdem hominibus dicte Vallis quedam alia concessit.

Apparebat etiam manifeste, per tenorem instrumenti supradicti, datum dicti instrumenti fuisse factum in dicta Valle de Aran, decimo kalendas augusti anno Domini millesimo ducentesimo sexagesimo quinto, et ipsum instrumentum clausum fuisse per Simonem de Sancto Felicio, de manfato domini Regis predicti, loco, die et anno preficis.

In cuius rei testimonium evidens et cautelam firmiorem presentem cartam fieri fecimus et eandem sigillari sigillo appendicio curie vicarie iamdicte civitatis Barchinone.

Que est acta in civitate Barchinone, quarto kalendas marcii anno Domini millesimo ducentesimo nonagesimo nono.