Conoçida cosa sea a todos los ommes que esta carta vieren, como yo don Jaymes, por la gracia de Dios rey de Aragón, e de Mayorga, e de Valencia, e conde de Barcalona e de Urgel, et sennor de Montpesler; et yo infant don Alfonso, fijo del rey don Ferrando, rey de Castiella, de Toledo, de León, de Gal.licia, de Córdova e de Murcia; fazemos aytal pleyto entre nos, que nos amemos e que nos ayudemos sobre todos los ommes del mundo, sacado el cuerpo del rey don Ferrando de Castiella.

Et sacado el cuerpo del rey don Ferrando, que nos amemos nos e todas las nuestras cosas, e que nos guardemos, et que nos ayudemos, assí como sobredicho es, contra todos los ommes del mundo, a buena fe sin mal enganno.

Et de mays, si algún vasallo fiziere cosa por que amor del rey e de don Alfonso aya de perder, que non se [.....] los vassallos el uno al otro.

Et porque este pleyto sea más firme e [más estable], mandamos fazer dos cartas partidas por A B C, tal la una como la otra, e que ponga don Jaymes rey de Aragón su siello de plomo en la una, e en la otra. Et otrossí el infante don Alfonso, en la una e en la otra.

D'esto son testigos que lo vieron e que lo oyeron, del rey de Aragón don Guillem de Moncada, don Xemen de Foçes, don Arnalt obispo de Valencia, don n’Uco de Folalquer, maestre del Ospital de sant Iohan, don Guillem de Cardona, maestre del Temple. De Castiella don Diego Lopez de Faro, don Alfonso Tellez, don Guillermo obispo de Cuenca, don Pelay Péreç, maestre de Uclés, don Martín Martínez, maestre del Temple.

Facta carta ante Villenam et Almizra, quando hovieron sus vistas el rey de Aragón e el infante don Alfonso, era Mª CCª LXXXª secunda.