Manifestum sit omnibus, quod nos Jacobus, Dei gratia rex Aragonum, comes Barchinone et dominus Montispesulani; volentes et debentes illos qui mandato nostro alicui dampnum intulerint inde ponens pro viribus conservare; idcirco cum hac presenti carta promittimus vobis, dilectis et fidelibus nostris iusticie, iuratis ac toti consilio de Iacca, presentibus et futuris, quod nunc ex omni tempore vos et vestra omnia tueamur et deffendamus, et simus vobis garentes et deffensores contra Peregrinum de Atrosillo, et Egidium fratrem eius, et suos.

Ita quod si forte dictus Peregrinus et Egidius de Atrosillo, aut amici vel valitores sui, occasione dampni vel mali quod eis in castro et turre de Atrossillo, et palaciis suis, et castro de Attares, et aliis rebus suis et possessionibus nostro mandato et nomine intulistis, vobis aut rebus vestris malum aliquod irrogarent, nos faciamus vobis inde fieri emendam ad vestram plenam voluntatem. Et non permittemus vos ab ipsis vel amicis vel valitoribus suis hac ratione ullatenus molestari.

Et de hoc complendo et attendendo, recipimus vos in fide Dei et legalitate nostra.

Insuper volumus et mandamus firmiter maiordompnus, repostario, merinis nostris, et aliis universis hominibus terre nostre, quod vos dictos homines de Iacca, vel res vestras aliquas, non permittant hac ratione ab ipsis Peregrino et Egidio de Atrossillo, vel valitoribus suis aut amicis suis, aliquatenus molestari, immo vos deffendant contra eos et valitores et amicos suos, et manuteneant vos viriliter et potenter, si de nostri confidunt gratia et amore.

Data Ylerde IIII nonas aprilis Era Mª CCª LXª quarta.

Signum + Iacobi, Dei gratia regis Aragonum, comitis Barchinone et [domini] Montispesulani.

Testes huius rey sunt: B. episcopus Ylerdensis, G. episcopus Vitan [sic], F. ynfans Aragonum, P. Ferrandi de Albarracino, Petro Aunes, Ato Orella, Lupus Ferrenqui de Luna, R. de Cervera, R. de Montecatano, G. R. senescalte, Belengarius de Erillo.

Sig+num Bertrandi de Villa Nova, qui mandato domini regis et Petri Sancii, notarii sui, hoc scribi fecit, loco die et era prefixis.