Pateat universis, quod nos Iacobus Dei gratia rex Aragonum, Maioricarum, Valentie, comes Barchinone et Urgelli et dominus Montispesulani; recognoscimus et confitemur vobis probis hominibus et toti universitati de Iacca, quod cum ad aures nostras pervenisset quod in villa predicta de Iaca adeo inoleverat usuraria pravitas, quod manifeste ibi dabatur peciam ad usuram; et nos fecimus diligenter super eo veritatem inquiri, id quod nobis denuntiatum super premissis fuerat non invenimus plenitudinem veritatis habere; unde nos omnem infamiam que ratione iamdicti pestis usurarii contra vos insurrexerat obolemus penitus, et removemus a vobis omni bone fame et bono testimonio vos et vestros perpetuo restituentes omnino; igitur per nos et nostros remittimus et absolvimus, ac perpetuo diffinimus vobis, iamdictis probis hominibus et toti universitati de Iacca et vestris, in perpetuum, omnem questionem et demandam quam ratione statuti alicuius a nobis contra usurarios editi, vel quacumque alia ratione vobis facere vel contra vos aut bona vestra poteramus movere super predictis usque in hodiernum diem.

Ita quod nos vel nostri unquam aliquo tempore vobis et vestris non possimus movere questionem aliquam vel demandam facere quecumque iure, statuto, consuetudine vel ratione, nec vos vel vestri nobis vel nostris aut cuicumque alii persone teneamini respondere in aliquo, nec inde ullam reddere rationem; set sitis inde penitus vos et vestri cum omnibus bonis mobilibus et inmobilibus, habitis et habendis, absoluti perpetuo liberi et inmunes.

Mandantes baiulis, merinis, çaliamedinis, iusticiis, iuratis, paciariis, portariis, et universis aliis officialibus et subditis nostris, ac locum nostrum tenentibus, presentibus et futuris, quod hanc recognitionem, absolutionem et remissionem nostram firmam habeant penitus et observent, et contra ipsam non veniant nec aliquem venire permittant aliqua ratione.

Data Calataiubi XVIIIº kalendas ianuarii anno Domini millesimo ducentesimo quinquagesimo quinto.

Signum + Iacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.

Testes sunt, Bn. Guillelmus de entenza, Iaufridus vicecomes Rochabertini, Alvarus Petri de Açagra, Sancius de Antilione, P. Martini de Luna.

Sig+num Michaelis de Alcoario, qui mandato domini regis pro domino fratre Andrea episcopo Valentino, cancellario suo, hoc scribi fecit, loco die et anno prefixis.