Noverint universi, quod ex parte proborum hominum Perpinyani fuit supplicatum nobis Iacobo, Dei gratia regi Aragonum, Maioricarum et Valencie, comiti Barchinone et Urgelli et domino Montispesullani, quod consuetudinem quam ipsi ab antiquo habent scriptam in libro aliarum consuetudinum Perpinyani que est talis:

“Item, quilibet potest extrahere bladum suum tam per mare quam per terram nullo dato curie et vendere cuilibet extraneo, etiam ita quod ille extraneus potest illud extrahere nullo similiter dato curie, nisi leudis antiquis que dantur in mari confirmaremus eisdem”.

Unde nos, Iacobus, Dei gratia rex predictus, inclinati supplicacioni predicte de speciali gracia dictam consuetudinem vobis, preffatis probis hominibus et universis aliis ville Perpinyani presentibus et futuris, in hunc modum duximus perpetuo per nos et nostros confirmandam, videlicet quod possitis de cetero libere et sine aliquo impedimento nostro et nostrorum seu alterius cuiuslibet persone, vendere bladum vestrum cui volueritis, exceptis sarracenis, et exceptis similiter christianis guerreantibus nobiscum seu cum nostris, et etiam extrahere dictum bladum seu extrahi facere de Rossilione, et mittere seu ducere et duci facere ad quascumque partes volueritis, exceptis omnibus locis sarracenorum, et similiter christianorum guerreancium nobiscum, vobis tamen persolvantibus lezdas et pedagia consueta de blado antedicto.

Mandantes firmiter universis vicariis, baiulis, et aliis officialibus nostris Perpinyani et Rossilionis, ac etiam omnium aliorum locorum tocius nostre iurediccionis, presentibus videlicet et futuris, quatinus predicta firma habeant et observent et faciant ab omnibus inviolabiliter observari, et non contraveniant nec aliquem contravenire permittant aliquo modo vel aliqua racione.

Datum Perpinyani, Vº idus aprilis, anno Domini millesimo CCº LXXº quarto.

Signum + Iacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispessulani.

Testes sunt, G. vicecomes Caprarie, Guillermus vicecomes Castri Novi, Dalmacius de Castro Novo, Hugo de Baucio, Gaucerandus de Pinos.

Sig+num Michaelis Violeta, qui mandato domini regis hec scribi fecit loco die et anno prefixis.