Noverint universi, quod nos Iacobus Dei gratia rex Aragonum, Maioricarum et Valencie, comes Barchinone et Urgelli et dominus Montispessulani, per nos et nostros damus et concedimus vobis, probis hominibus et universitati ville Perpinyani, presentibus et futuris, in perpetuum, quod omnes et singuli habitatores Perpinyani tam milites quam quilibet alii, teneantur solvere partem suam in omnibus et singulis expensis sive talliis que fient inter vos pro comunitate dicte ville, et ad comodum eiusdem, non obstantibus aliquibus franchitatibus per nos vel predecessores nostros concessis eisdem vel concedendis, cum non sit intentionis nostre aliquos ex ipsis fore franchos de hiis que expendentur ad comodum dicte ville et pro comunitate, sed tantum de questiis et de aliis regalibus exactionibus.

Volentes et concedentes vobis quod si forte aliquis vel aliqui contra huiusmodi concessionem nostram seu a prestatione eorum que pro comunitate vestra et ad comodum eiusdem fient, ut est dictum, voluerint excusare ipsum et ipsos deffendere non teneamini, ymmo a comunitate ville vestre abiciantur.

Mandantes vicariis, baiulis et aliis universis officialibus et subditis nostris presentibus et futuris, quod predicta omnia firma habeant et observent et faciant observari, et non contraveniant nec aliquem contravenire permittant aliqua racione.

Datum Barchinone, tercio kalendas septembris anno Domini millesimo ducentesimo LXº IIIIº.

Signum + Iacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispessullani.

Testes sunt, Gaucerandus de Pinos, Raymundus de Servaria, Periconus de Montecatheno, Bernardus de Sintillis, Guillermus de Sancto Vincencio.

Sig+num Bartholomei de Porta qui mandato domini regis hec scribi fecit et clausit loco die et anno prefixis.