Noverint universi, quod nos Iacobus Dei gratia rex Maioricarum, comes Rossilionis et Ceritanie et dominus Montispessulani; volentes precedessorum nostrorum vestigia imitare et comoda subiectorum nostrorum de bono in melius augmentare, idcirco per nos et omnes successores nostros nunc et in perpetuum laudamus et confirmamus, et omni modo approbamus vobis omnibus hominibus ville Perpinyani presentibus et futuris, habitantibus et habitaturis in eadem villa et toti universitati eiusdem ville, et vobis Laurencio Rotundi et Raymundo Aurerii, et Guillermo Hominis Dei et Bernardo de Vilardono, consulibus eiusdem ville Perpinyani nomine eiusdem ville et universitatis eiusdem recipientibus, omnes et singulas consuetudines vobis a predecessoribus nostris iam datas et concessas, prout quidem predicte consuetudines vobis date sunt et concesse ab eisdem.

Ita quod vos et successores vestri habitatores ville Perpinyani utamini et uti possitis predictis consuetudinibus et earum qualibet in iudiciis et extra iudicium et quolibet alio modo.

Item, laudamus, approbamus et confirmamus vobis, predictis universis et singulis presentibus et futuris, et consulibus supradictis, omnes alias consuetudines bonas approbatas et observatas usque nunc et usus approbatos qui in scriptis redacti vel redacte non sunt, et etiam omnia instrumenta et privilegia a domino rege Aragone quondam patre nostro, et ab aliis predecessoribus nostris vobis data, laudata, concessa et confirmata, prout in eisdem plenius continetur.

Mandantes baiulo Perpinyani et vicario Rossilionis, et universis aliis officialibus nostris presentibus et futuris, quod predictas confirmationes nostras firmas habeant et observent, et non contraveniant nec aliquem contravenire permittant aliqua racione.

Datum Perpinyani XVIIIº kalendas febroarii anno Domini millesimo CCº LXXº sexto.

Signum + Iacobi, Dei gratia regis Maioricarum, comitis Rossilionis et Ceritanie et domini Montispessulani.

Testes sunt, Guillermus de Caneto, Ermengaudus de Urgio, Gaufridus de Rochabertino, Gaucerandus de Urgio, Arnaldus de Lupiano.

Sig+num Petri de Calidis, qui mandato dicti domini regis hec scribi fecit et clausit loco die et anno preffixis.