Noverint universi, quod nos Iacobus Dei gratia rex Maioricarum, comes Rossilionis et Ceritanie, et dominus Montispesulani, volentes predecessorum nostrorum vestigia imitare et comoda subiectorum nostrorum de bono in melius augmentare, attenta et considerata magna utilitate subiectorum nostrorum ville Perpinyani, si due scole scribanie in eadem villa constituantur, in quibus et qualibet earum officium tabellionatus publice exerceatur; idcirco per nos et omnes successores nostros statuimus, volumus et concedimus in perpetuum vobis omnibus hominibus ville Perpinyani universis et singulis presentibus et futuris habitantibus nunc et in futurum habitaturis, et toti universitati dicte ville Perpinyani, et vobis Laurencio Rotundi, et Raymundo Aurerii, et Guillermo Hominis Dei et Bernardo de Vilardono, consulibus eiusdem ville Perpinyani nomine eiusdem ville et universitatis eiusdem recipientibus, quod de cetero sint due scole scribanie publice in villa Perpinyani, quequidem scole in diversis locis ipsius ville in quarum qualibet sit unus tabellio publicus residens in eadem per quem publicum officium tabellionatus in omnibus exerceatur, prout est hactenus usitatum, volentes et concedentes quod predicte due scole scribanie sint et constituantur a modo in dicta villa in perpetuum, a festo sancti Iohannis iunii proximo in antea.

Item, volentes et considerantes reducere scripturas infrascriptas ad taxationem debitam et congruam, concedimus predictis consulibus et universitati ville Perpinyani quod scriptor curie baiuli dicte ville et etiam vicarii non possit exigere vel percipere ab aliquo habitatores ville Perpinyani pro transcripto alicuius testimonii, nisi duos denarios, et pro qualibet littera sigillata quatuor denarios, et si fuerit divisa per alphabetum sex denarios, et pro qualibet carta emencipationis tutele vel cure vel diffinitionis vel remissionis vel qualibet alia decem denarios, et pro transcripto actorum pro medio folio papirus sex denarios, et pro transcriptis quorumlibet instrumentorum productorum vel producendorum in iudiciis in curia baiuli ville Perpinyani predicte secundum formam medie folie papirus.

Item, volentes facere gratiam specialem predictis consulibus et universitati ville Perpinyani, damus et concedimus eisdem per privilegium speciale, quod aliquis baiulus curie Perpinyani non possit a modo appellare a sentenciis diffinitivis vel interlocutoriis latis vel ferendis in criminibus per iudicem vel iudices eiusdem curie contra ipsum baiulum.

Item, quod aliquis captus in curia predicti baiuli vel qui a modo capietur, non solvat carcellagium nec aliquid aliud sagionibus vel aliquibus aliis de curia, nisi pro causa qua captus fuerit, fuerit condempnatus vel compositionem fecerit pro eadem.

Item, quod pro tutela vel cura vel confirmatione earundem, vel emencipatione vel adoptione vel arrogatione, dandis et confirmandis ab aliquo predictorum vel quolibet ipsorum dominus ville Perpinyani, baiulus vel vicarius vel iudex vel curialis aliquis non possint aliquid petere, exigere vel recipere ab hominibus ville Perpinyani presentibus et futuris, sed gratis habeant ipsa facere quilibet eorumdem.

Item, statuimus quod quandocumque contigerit dominum ville Perpinyani vel in eius absencia baiulum dicte ville eligere quatuor consules, eligat duodecim consiliarios dicte ville qui una cum dictis consulibus habeant curam de omnibus negociis dicte ville, et faciant et pertractent ea que dicte ville fuerint utilia prout eis visum fuerit faciendum.

Mandantes baiulo Perpinyani et vicario Rossilionis et universis aliis officialibus nostris presentibus et futuris, quod predicta omnia et singula ut superius expressa sunt firma habeant et observent, et non contraveniant nec aliquem contravenire permittant aliqua racione.

Datum Perpinyani XVIIIº kalendas febroarii anno Domini millesimo ducentesimo septuagesimo sexto.

Signum + Iacobi, Dei gratia regis Maioricarum, comitis Rossilionis et Ceritanie et domini Montispesulani.

Testes sunt, Gaufridus de Rochabertino, Guillermus de Caneto, Gaucerandus de Urgio, Ermengaudus de Urgio, Xatbertus de Barbarano, Berengarius Surdi, Arnaldus de Lupiano.

Sig+num Petri de Calidis, qui mandato dicti domini regis hec scribi fecit et clausit, cum litteris rasis in linea VIIIª ubi dicitur “predicti ville Perpinyani”, loco die et anno prefixis.