Noverint universi, quod nos Iacobus Dei gratia rex Maioricarum, comes Rossilionis et Ceritanie et dominus Montispesulani, volentes providere utilitati hominum ville Perpiniani per nos et nostros ex certa sciencia cum hoc nostro instrumento concedimus universitati eiusdem ville et singulis eiusdem universitatis presentibus et futuris, et vobis Petro de Castilione et Bernardo Fusterii, et Guillermo Vole et Berengerio Corbera, consulibus dicte ville nomine universitatis predicte et singulorum eiusdem ville recipientibus, quod de cetero de aliqua querimonia que exposita fuerit coram baiulo et in curia baiuli Perpiniani non adquiratur iusticia ipsi curie, nec baiulus ipsius curie ipsam iusticiam petere seu exigere possit de querimonia exposita dicte curie, infra decem dies a die dicte querimonie exposite computandos, nec etiam post dictos decem dies nisi retroclamum sive querela iterata fuerit de quantitate seu re de qua primo fuerit iam querela exposita.

Quo retroclamo seu iterata querela facta in continenti iusticia solita sit dicte nostre curie adquisita de illa scilicet quantitate seu re de qua dicta retroquerimonia facta fuerit, secundum tamen formam et modum hactenus in dicta curia usitatum.

Volentes et concedentes per nos et nostros successores dictis consulibus probis hominibus et universitati ville Perpiniani predicte, presentibus et futuris, quod predicta concessio nostra eis et suis successoribus sub forma predicta in perpetuum observetur.

Mandantes vicario Rossilionis et baiulo et iudici Perpiniani, et universis aliis officialibus nostris presentibus et futuris, quod predictam concessionem nostram perpetuo firmam habeant et observent et non contraveniant nec aliquem contravenire permittant aliqua racione.

Et ad maiorem firmitatem predicte concessionis nostre presens instrumentum sigillo nostro pendenti iussimus comuniri.

Datum apud Villam Sicham campi Terrachone, sexto decimo kalendas ianuarii anno Domini millesimo ducentesimo nonagesimo nono.

Sig+num Iacobi Dei gratia regis Maioricarum, comitis Rossilionis et Ceritanie et domini Montispessulani.

Testes sunt Iaubertus vicecomes Castri Novi, Petrus Gaucerandi de Pinos, Ar. de Sagua, Berengerius de Hulmis, Iacobus de Muredine milites, Iacobus de Bernicio miles utriusque iuris professor, Stephanus Sabors et Arnaldus Baiuli, dicti domini regis iudices.

Sig+num Petri de Calidis qui mandato dicti domini regis hec scribi fecit, et clausit, loco die et anno preffixis.