Iacobus Dei gracia rex Aragonum, Maioricarum et Valencie, comes Barchinone et Urgelli et dominus Montispesulani. Fideli suo Salvatori, canonico Barchinone. Salutem et gratiam.

Cum nos questionem que inter vos nomine nostro, ex una parte, et homines Perpiniani, ex altera, vertebatur super alodiis et forescapiis ville Perpiniani duxerimus sentencialiter terminandam, dicimus vobis firmiter et districte quatinus in facto predicto alodiorum et foriscapiorum procedatis prout nos sentenciandum duximus, videlicet in hunc modum: quod si alodia constituta inter muros Perpiniani venderentur et stabilirentur, vel alio modo alienarentur, aut vendita stabilita vel alienata sint de quantitate precii que racione venditionis haberentur inde vel donarentur, nos habeamus inde nostrum foriscapium.

Si vero illi qui stabilirent, venderent vel alio modo alienarent censum sibi retentum in ipso honores vel ius quod in eo haberent, quod nos de precio venditionis vel quantitatis que ratione alicuius alienationis haberetur similiter, accipiamus nostrum foriscapium et habeamus.

Si vero illi qui predictum honorem ad acapitum haberent et tenerent et censum inde facerent quandocunque si vellent vendere ius quod in ipso honore sive alodio haberent, nos foriscapium de quantitate precii accipiamus integrum atque totum.

Et sic ut predictum est fieri et servari mandamus de omnibus venditionibus, stabilimentis, permutacionibus, acapitis et aliis alienationibus factis a LXª annis citra et de cetero faciendis, unde precium receptum sit vel de cetero recipiatur, exceptis tantum hiis que in hac dicta nostra sentencia excipimus, prout in ea plenius continere noscuntur et in ea videbitis contineri.

Mandantes vobis quatinus ad predicta complenda et facienda compellatis et distringatis homines antedictos, et hoc non mutetis. [103v]

Datum Gerunde, tercio kalendas octobris, anno Domini millesimo ducentesimo sexagesimo quinto.