Non solum corpus exponimus ut christiani nominis crescant lilia in partibus paganorum, verum etiam ut novelle plantacionis ordinus in paganorum civitatibus atque villis per nos noviter acquisitis floreant pro viribus laboramus.

Nos igitur, Iacobus, Dei gratia rex Aragonum et regni Maioricarum, comes Barchinone et Urgelli et dominus Montispessulani, cupientes possessiones et bona domus sive ordinis sancti Geraldi de Silva, in hiis que benigne poterimus plus solito augmentacione, donamus et concedimus per hereditatem propriam, francam et liberam vobis, dilecto nostro fratri Bernardo de Born, comendatori de Alcalano stipulanti, et per vos ordini sancti Geraldi et comendatoribus vestris successoribus in eundem in perpetuum, castrum et villam totum ab integro quod dicitur Almexixe, situm iuxta castrum novum de Sogorbio.

Et habeatis illum cum pratis, pascuis, aquis, fontibus, herbis, lignis, montibus, planis et eorumdem venacionibus, cum fortitudinibus, terrementis, terris cultis, incultis, heremis et populatis, cum silvis, cunctis nemoribus, arboribus fructiferis, infructiferis, introitibus, exitibus, terminibus, et cum omnibus aliis et singulis ad eundem pertinentibus teneatis vos et ordo ac comendatores vestri successores, possideatis, expletetis, melioretis, inpignoretis, donetis, alienetis, vendatis, comutetis, voluntates vestras et successorum comendatorum eiusdem perpetuo, libere faciendas cuicumque voluntatis, exceptis secularibus militibus.

Hoc intellecto retento et salvo vobis et vestris, et salvo nobis et nostris in perpetuum, quod si dictum castrum et villam vendideritis, dabitis, alienabitis alicui alii per seculari habeamus potestatem pacem et guerram in eisdem contra omnes homines, et nullus contra nos et quandocumque et quocienscumque irati paccati inde potestatem habere voluerimus et demandabimus per litteras aut nuncios, detur nobis potestas eiusdem castri et meis in perpetuum, sine aliquo contradicto ipsis nobis facientibus et nostris quando demandabimus homagium pro dictis melius observandis.

Datum in obsidione Valencie, kalendas iulii Era Mª CCª LXXª sexta.

Signum + Iacobi, Dei gratia regis Aragone et regni Maioricarum, comitis Barchinone et Urgelli et domini Montispessulani.

Huius rei testes sunt P. Ferrandiz de Azagra, Artallus de Alagone, Rodericus de Lizana.

Sig+num Guillelmoni scribe, qui mandato domini regis pro domino Berengario Barchinonensi episcopo, cancellario suo, hanc cartam scripsit loco die et era prefixis.