Nos Jacobus, Dei gratia rex Aragonum, Valencie, Sardinie et Corsice ac comes Barchinone.

Ad humilem supplicacionem per vos nobilem et dilectum nostrum Johannem Eximini de Urrea nobis factam, concedimus quod de cetero sit mercatum qualibet septimana, videlicet die mercurii, in popula seu villa vestra de Las Alcoras, in regno Valencie situata.

Ita quod omnes venientes ad ipsum mercatum veniant et sint salvi et securi cum omnibus rebus suis et mercibus quas secum detulerint, in veniendo, stando, ac etiam redeundo, sic quod non pignorentur, marchentur, detineantur, seu capiantur, culpa crimine vel debitis alienis nisi sint malefactores seu banniti aut principaliter vel fideiussorio nomine obligati, nec etiam in hiis casibus quando sint debitores vel fideiussores nisi prius de ipsis fatica inventa fuerit de directo.

Hanc autem gratiam facimus sine iuris preiudicio alieni.

Mandantes per presentem cartam nostram universis et singulis officialibus nostris, presentibus et futuris, quod hanc concessionem nostram firmam habeant et observent et faciant inviolabiliter observari, et non contraveniant nec aliquem contravenire permittant aliqua racione.

Datum Valencie, quarto nonas madii anno Domini millesimo trescentesimo sexto.

Sig+num Jacobi, Dei gratia regis Aragonum, Valencie, Sardinie et Corsice, ac comes Barchinone.

Testes sunt: Jacobus de Xericha, Jacobus Petri, Gombaldus de Entença, Johannes Eximeni de Urrea, Berengarius de Entença.

Sig+num mei Guillermi Augustini, scriptoris domini regis predicti, qui mandato ipsius michi facto per venerabilem Poncium de Monello, vicecancellarium eiusdem domini regis, hec scripsi et clausi loco die et anno prefixis.